جہلم شہر سمیت ضلع بھر میں اشیائے ضروریہ کی بڑھتی ہوئی قیمتوں اور ہوشربا مہنگائی نے عام آدمی کی مشکلات میں مزید اضافہ کر دیا ہے، جبکہ غریب، سفید پوش اور دیہاڑی دار طبقہ مہنگائی کی چکی میں پسنے پر مجبور ہے۔ شہریوں کے مطابق روزمرہ استعمال کی اشیائے خوردونوش کی قیمتوں میں مسلسل اضافے کے باعث گھر کا بجٹ بری طرح متاثر ہو رہا ہے اور دو وقت کی روٹی کا حصول بھی مشکل بنتا جا رہا ہے۔
رپورٹ کے مطابق روزمرہ استعمال کی اشیائے خوردونوش کی قیمتوں میں آئے روز اضافے کے باعث عام شہری شدید پریشانی کا شکار ہیں۔ شہریوں کا کہنا ہے کہ محدود آمدنی میں گھر کے اخراجات پورے کرنا مشکل ہو چکا ہے، جبکہ مہنگائی میں مسلسل اضافے کے باعث غریب اور متوسط طبقے کی قوتِ خرید میں نمایاں کمی واقع ہو رہی ہے۔
شہریوں کے مطابق بیروزگاری اور غربت میں اضافے کے باعث پہلے ہی مشکلات کا سامنا ہے، جبکہ کمر توڑ مہنگائی نے مزدوروں اور دیہاڑی دار طبقے کو سب سے زیادہ متاثر کیا ہے۔ روزانہ اجرت پر کام کرنے والے افراد کے لیے گھر کا راشن، بچوں کی ضروریات اور دیگر بنیادی اخراجات پورے کرنا ایک بڑا مسئلہ بن چکا ہے۔
عوام کی سہولت کے لیے قائم کیے گئے مختلف بازاروں اور سٹوروں میں بھی مہنگائی کے اثرات نمایاں ہیں۔ شہریوں کا کہنا ہے کہ بعض سٹوروں پر آٹا، گھی، چینی اور دالوں سمیت ضروری اشیاء کی دستیابی بھی مسئلہ بنتی جا رہی ہے، جس کے باعث حکومتی ریلیف کے دعوے عملی طور پر بے اثر دکھائی دیتے ہیں۔
شہریوں کا مزید کہنا ہے کہ رہی سہی کسر مبینہ طور پر ذخیرہ اندوزوں اور بلیک مارکیٹنگ کرنے والے عناصر نے پوری کر دی ہے، جو مصنوعی قلت پیدا کرکے اشیائے ضروریہ کی قیمتوں میں اضافے کا باعث بن رہے ہیں۔ شہریوں نے مطالبہ کیا کہ ضلعی انتظامیہ اور متعلقہ حکام مارکیٹوں میں مؤثر نگرانی کا نظام قائم کریں، مصنوعی مہنگائی اور ذخیرہ اندوزی کے خلاف کارروائی کریں اور اشیائے ضروریہ کی مقررہ نرخوں پر دستیابی یقینی بنائیں۔
شہریوں نے اربابِ اختیار سے مطالبہ کیا ہے کہ جہلم سمیت ضلع بھر میں بڑھتی ہوئی مہنگائی کا فوری نوٹس لیتے ہوئے اشیائے ضروریہ کی قیمتوں کو کنٹرول کرنے، مصنوعی قلت کے خاتمے اور عام آدمی کو حقیقی ریلیف فراہم کرنے کے لیے مؤثر اقدامات کیے جائیں تاکہ غریب اور دیہاڑی دار طبقہ مزید معاشی مشکلات سے محفوظ رہ سکے۔
-
-
-
-
