دینہ میں جشن عید میلادالنبی ﷺ کے سلسلے میں سیرت النبی ﷺ کانفرنس، علما و شہریوں کی بھرپور شرکت

دینہ میں جشنِ عید میلادالنبی ﷺ کے سلسلے میں سیرت النبی ﷺ کانفرنس، پیغامِ پاکستان اور محفلِ میلاد نجی مارکی میں نہایت شایانِ شان انداز میں منعقد کی گئی۔

تقریب کی صدارت اسسٹنٹ کمشنر دینہ صفاء عابد چغتائی نے کی جبکہ مہمانِ خصوصی ایڈیشنل ڈپٹی کمشنر ریونیو جہلم سنیہ صافی تھیں۔ انتظامات اسسٹنٹ کمشنر دینہ صفاء عابد چغتائی اور ایڈمنسٹریٹر میونسپل کمیٹی دینہ کی زیر نگرانی کیے گئے۔

محفل میں نعت خوانوں نے بارگاہِ رسالت ﷺ میں عقیدت کے پھول نچھاور کیے جبکہ علما کرام نے سیرتِ طیبہ ﷺ پر تفصیلی روشنی ڈالی۔ مقررین نے کہا کہ پیغامِ پاکستان کی روشنی میں اتحاد، امن اور اخوت وقت کی اہم ضرورت ہے۔ تقریب میں تمام مکاتبِ فکر کے نمائندوں سمیت شہریوں کی بڑی تعداد نے شرکت کی۔

اسسٹنٹ کمشنر دینہ صفاء عابد چغتائی نے خطاب کرتے ہوئے کہا کہ اللہ تعالیٰ کا ہم پر خصوصی کرم ہے کہ ہمیں اپنے پیارے نبی حضرت محمد ﷺ کی ولادت کا جشن جوش و خروش سے منانے کا موقع ملا۔ انہوں نے کہا کہ ماہِ ربیع الاول رحمتوں اور برکتوں کا مہینہ ہے، ہمیں چاہیے کہ نبی اکرم ﷺ کی تعلیمات کو سمجھ کر اپنی زندگیوں میں نافذ کریں۔

تقریب سے مذہبی سکالر علامہ شعیب الحسن سیالوی، حافظ وسیم انور، علامہ ناصر سلطانی، پروفیسر ثناء اللہ، اسد ڈار، آصف بھٹی اور حافظ عبدالرحمن نے بھی خطاب کیا، جبکہ کمپیئرنگ کے فرائض علامہ شہزاد عامر چشتی نے سرانجام دیے۔

اس موقع پر تحصیل دینہ کے تمام سرکاری اداروں کے سربراہان، سابق چیئرمین بلدیہ دینہ شیخ اکرام الٰہی، چیف آفیسر میونسپل کمیٹی محمد فیصل، علامہ خلیل قاظمی، راجہ جنید کیانی، ڈپٹی ہیلتھ آفیسر ڈاکٹر ارشاد تونیو، ریسکیو 1122 کے محمد ابرار، راجہ ساجد نواز، میاں سجاد، چوہدری تصدق، تجاوزات انسپکٹر عدیل بٹ، نذیر جماعتی، محمد وقار، حق نواز، نائب تحصیلدار محمد عمران، رضوان سیٹھی، سہیل انجم قریشی، سید ذوالقرنین شاہ، جرار حسین میر سمیت معززین اور شہریوں کی کثیر تعداد شریک ہوئی۔

شرکائے محفل نے کہا کہ جشنِ میلادالنبی ﷺ اتحاد بین المسلمین کا خوبصورت مظہر ہے، جو ہمیں محبت، بھائی چارے اور امن کا درس دیتا ہے۔ انہوں نے اس عزم کا اظہار کیا کہ ہمیں اپنی انفرادی اور اجتماعی زندگیوں میں سیرتِ رسول ﷺ کو اپنانا چاہیے۔