دینہ میں مہنگائی کا طوفان، سبزیاں اور فروٹ عوام کی قوت خرید سے باہر، ٹماٹر 400 روپے کلو تک پہنچ گئے

دینہ میں مہنگائی کا طوفان ٹماٹر ، سبزیاں اور فروٹ عوام کی قوت خرید سے باہر ، ٹماٹر 300سے لے کر 400روپے کلو تک فروخت ہونے لگا ، غریب سفید پوش طبقہ پریشان ریٹ سن کر کانوں کو ہاتھ لگانے لگے۔

تفصیلات کے مطابق جہلم کی تحصیل دینہ میں سبزیوں اور پھلوں کی قیمتوں میں ہوشربا اضافہ، ٹماٹر 300 سے 400 روپے فی کلو فروخت ہونے لگے۔ دیگر سبزیاں بھی عوام کی قوت خرید سے باہر، غریب اور سفید پوش طبقہ شدید پریشانی کا شکار ہیں۔

سبزی منڈی دینہ میں کریلے، توریاں، شملہ مرچ، گوبھی، بینگن سمیت بیشتر سبزیاں عام آدمی کی پہنچ سے باہر ہو گئیں۔ شہری ریٹ سن کر ہاتھ ملتے رہ گئے اور بیشتر خالی ہاتھ گھروں کو لوٹنے پر مجبور ہو گئے۔

شہریوں نے الزام لگایا کہ دکانداروں نے حکومتی ریٹ لسٹ کو یکسر نظر انداز کر دیا ہے جبکہ انتظامیہ خاموش تماشائی بنی ہوئی ہے۔

عوامی حلقوں نے ڈپٹی کمشنر جہلم میر رضا اوزگن اور اسسٹنٹ کمشنر دینہ سے فی الفور نوٹس لینے اور مہنگے داموں سبزیاں و پھل فروخت کرنے والوں کے خلاف سخت کارروائی کا مطالبہ کیا ہے۔