جہلم میں برائلر گوشت سرکاری نرخ سے زائد قیمت پر فروخت، شہریوں میں تشویش

جہلم شہر میں برائلر گوشت سرکاری نرخ مقرر ہونے کے باوجود مبینہ طور پر زائد قیمت پر فروخت کیے جانے پر شہریوں نے شدید تشویش کا اظہار کرتے ہوئے ضلعی انتظامیہ سے فوری نوٹس لینے کا مطالبہ کیا ہے۔

رپورٹ کے مطابق سرکاری نرخ نامے میں برائلر گوشت کی قیمت 446 روپے فی کلوگرام مقرر ہے، تاہم شہریوں کا کہنا ہے کہ اوپن مارکیٹ میں اس نرخ پر عملدرآمد نہ ہونے کے برابر ہے۔ شہر کے مختلف علاقوں میں برائلر گوشت 550 روپے فی کلوگرام تک فروخت کیا جا رہا ہے، جس سے صارفین کو اضافی مالی بوجھ برداشت کرنا پڑ رہا ہے۔

شہریوں کے مطابق بعض دکاندار صاف گوشت کے نام پر مزید اضافی رقم وصول کرتے ہیں، جبکہ سرکاری نرخ نامے کو نظر انداز کرتے ہوئے من مانی قیمتیں وصول کی جا رہی ہیں۔ ان کا کہنا ہے کہ متعلقہ اداروں کی مؤثر نگرانی نہ ہونے کے باعث یہ صورتحال مسلسل برقرار ہے۔

شہریوں نے ضلعی انتظامیہ اور پرائس کنٹرول مجسٹریٹس کی خاموشی پر بھی سوالات اٹھاتے ہوئے کہا کہ اگر گرانفروشی کے خلاف بروقت کارروائیاں کی جائیں تو عوام کو ریلیف مل سکتا ہے۔

دوسری جانب فارمی انڈوں کی قیمت میں نسبتاً استحکام برقرار ہے، تاہم مجموعی مہنگائی اور عوام کی قوتِ خرید میں مسلسل کمی کے باعث بنیادی غذائی اشیاء کی خریداری بھی عام شہریوں، خصوصاً کم آمدن اور دیہاڑی دار طبقے کے لیے دشوار ہوتی جا رہی ہے۔

شہریوں نے ڈپٹی کمشنر جہلم اور متعلقہ حکام سے مطالبہ کیا ہے کہ برائلر گوشت کی سرکاری قیمت پر سختی سے عملدرآمد کرایا جائے، گرانفروشی میں ملوث دکانداروں کے خلاف قانونی کارروائی کی جائے اور پرائس کنٹرول کے نظام کو مزید مؤثر بنایا جائے تاکہ عوام کو حقیقی ریلیف فراہم کیا جا سکے۔