دینہ: وزیر مملکت برائے خزانہ و ریلوے بلال اظہر کیانی نے دینہ میں سابق چیئرمین بلدیہ دینہ میاں عنصر محمود (مرحوم) کے گھر آمد کی اور میاں عنصر محمود، میاں آصف محمود کے بھائی میاں علی عنصر کے چچا میاں ناصر محمود سب انسپکٹر کی وفات پر اہلِ خانہ سے اظہارِ افسوس کیا۔
اتوار کے روز وزیر مملکت بلال اظہر کیانی نے اہلِ خانہ سے ملاقات کرتے ہوئے مرحوم میاں ناصر محمود سب انسپکٹر کی وفات پر گہرے دکھ اور افسوس کا اظہار کیا۔ انہوں نے کہا کہ مرحوم ایک نیک سیرت اور باوقار شخصیت تھے، جن کی خدمات کو ہمیشہ یاد رکھا جائے گا، اور اللہ تعالیٰ مرحوم کو جوارِ رحمت میں اعلیٰ مقام عطا فرمائے۔
اس موقع پر انہوں نے مرحوم کی درجات کی بلندی اور اہلِ خانہ کے لیے صبرِ جمیل کی خصوصی دعا بھی کی۔
وزیر مملکت کی دینہ آمد کے موقع پر شہریوں کی کثیر تعداد بھی موجود تھی جنہوں نے بلال اظہر کیانی سے ملاقات کی۔ اس موقع پر کوآرڈینیٹر راجہ علی، ناظم کیانی، سابق کونسلرز اور دیگر سیاسی و سماجی شخصیات بھی موجود تھیں۔ شہریوں نے وزیر مملکت کے سامنے دینہ شہر کے مختلف مسائل اور عوامی مشکلات سے آگاہ کیا۔
میاں علی عنصر نے وزیر مملکت کو شہر کو درپیش بنیادی مسائل، ترقیاتی ضروریات اور عوامی مشکلات کے بارے میں تفصیلی بریفنگ دی، جس پر بلال اظہر کیانی نے مسائل کے فوری اور مرحلہ وار حل کی یقین دہانی کروائی۔ انہوں نے کہا کہ عوامی مسائل کا حل حکومت کی اولین ترجیح ہے اور دینہ شہر کی ترقی و بہتری کے لیے ہر ممکن اقدامات کیے جائیں گے۔
آخر میں وزیر مملکت نے اہلِ علاقہ سے گفتگو کرتے ہوئے اس عزم کا اظہار کیا کہ وہ عوام کے مسائل کو ایوانوں تک پہنچانے اور عملی اقدامات کے ذریعے ریلیف فراہم کرنے کے لیے بھرپور کردار ادا کرتے رہیں گے۔
-
-
-
-
