جہلم: وزیر اعلیٰ پنجاب کی معاون خصوصی برائے فوڈ سیفٹی اینڈ کنزیومر پروٹیکشن سلمیٰ شاہین بٹ نے مشین محلہ نمبر 2 جہلم میں قائم نگہبان رمضان سہولت بازار کا دورہ کیا اور اشیائے ضروریہ کی قیمتوں اور معیار کا جائزہ لیا۔
انہوں نے مختلف اسٹالز کا معائنہ کیا اور خریداری کے لیے آنے والے شہریوں سے براہِ راست گفتگو بھی کی۔ شہریوں نے اشیاء کے معیار اور نرخوں پر اطمینان کا اظہار کیا جس پر معاون خصوصی نے ضلعی انتظامیہ کے انتظامات کو سراہا۔
میڈیا سے گفتگو کرتے ہوئے انہوں نے کہا کہ وزیر اعلیٰ پنجاب مریم نواز شریف کے وژن کے مطابق عوام کو مہنگائی سے بچانا حکومت کی اولین ترجیح ہے اور فوڈ سیفٹی و کنزیومر پروٹیکشن قوانین پر سختی سے عملدرآمد کروایا جا رہا ہے تاکہ ملاوٹ مافیا اور منافع خوروں کا خاتمہ کیا جا سکے۔
بعد ازاں انہوں نے جہلم کے ریڑھی بازار کا بھی تفصیلی دورہ کیا اور پرائس کنٹرول اقدامات کا جائزہ لیا۔ اس دوران انہوں نے مختلف ریڑھیوں پر اشیائے ضروریہ کی قیمتوں اور معیار کا معائنہ کیا اور سرکاری نرخ ناموں پر عملدرآمد نہ کرنے والے ریڑھی بانوں کو موقع پر سخت وارننگ جاری کی۔ انہوں نے انتظامیہ کو ہدایت دی کہ ریڑھی بازار کی روزانہ بنیاد پر مانیٹرنگ کی جائے تاکہ کوئی بھی دکاندار مقررہ نرخوں سے زائد قیمت وصول نہ کر سکے۔
اس موقع پر انہوں نے آیت بیکرز پر اچانک چھاپہ بھی مارا جہاں سنگین خلاف ورزیاں سامنے آئیں۔ معائنے کے دوران معلوم ہوا کہ بیکری میں سرکاری نرخ نامہ آویزاں نہیں تھا اور اشیاء مقررہ قیمت سے زیادہ نرخوں پر فروخت کی جا رہی تھیں جس پر فوری کارروائی کرتے ہوئے آیت بیکرز کو سیل کر دیا گیا۔
بعد ازاں معاون خصوصی سلمیٰ شاہین بٹ نے اکرم شہید پارک میں قائم نگہبان رمضان دسترخوان کا دورہ کیا جہاں انہوں نے مریم کے مہمان پروگرام کے تحت روزہ داروں کے لیے افطار کے انتظامات کا جائزہ لیا اور صفائی ستھرائی و خوراک کے معیار کو بھی چیک کیا۔
انہوں نے کہا کہ مخیر حضرات کے تعاون سے سینکڑوں مستحق افراد کو روزانہ باعزت طریقے سے افطاری فراہم کی جا رہی ہے جو انسانیت کی خدمت کی بہترین مثال ہے۔ شہریوں نے بھی اس اقدام کو سراہتے ہوئے حکومت اور انتظامیہ کے اقدامات پر اطمینان کا اظہار کیا۔
-
-
-
-
