جہلم: جہلم پنڈدادنخان روڈ پر نوگراں پل کے قریب دو موٹر سائیکلوں کے درمیان تصادم کے نتیجے میں 16 سالہ طالب علم جاں بحق جبکہ تین نوجوان زخمی ہو گئے۔
ریسکیو 1122 کے مطابق حادثہ نوگراں پل کے قریب پیش آیا، جہاں دو موٹر سائیکلیں آپس میں ٹکرا گئیں۔ ابتدائی اطلاعات کے مطابق حادثے کی وجہ موٹر سائیکلوں کی تیز رفتاری بتائی گئی ہے۔ تصادم کے نتیجے میں ایک نوجوان موقع پر ہی جاں بحق ہو گیا جبکہ تین دیگر نوجوان زخمی ہوئے۔
ریسکیو اہلکاروں نے زخمیوں کو موقع پر ابتدائی طبی امداد فراہم کرنے کے بعد ڈی ایچ کیو ہسپتال جہلم منتقل کر دیا، جبکہ جاں بحق نوجوان کی لاش بھی ہسپتال منتقل کی گئی۔
ریسکیو 1122 کی فراہم کردہ معلومات کے مطابق حادثے میں جاں بحق نوجوان کی شناخت 17 سالہ محمد عبداللہ ولد قدوس کے نام سے ہوئی ہے۔ زخمیوں میں 15 سالہ شمیر ولد واجد وسیم، 16 سالہ مزمل ولد محمد شفیق اور 17 سالہ احمد ولد امانت علی شامل ہیں۔
