جہلم میں سوئی گیس بلوں نے صارفین کی چیخیں نکلوا دیں

جہلم میں سوئی گیس صارفین کو موصول ہونے والے گھریلو بلوں نے شہریوں کی پریشانی میں مزید اضافہ کر دیا ہے۔

رواں ماہ کے دوران گھریلو صارفین کو دو ہزار روپے سے لے کر دس ہزار روپے تک کے گیس بلز موصول ہوئے ہیں، جو محنت کش طبقہ اور غریب گھریلو صارفین کے لیے مشکلات کا باعث بن گئے ہیں۔

غریب عوام کا کہنا ہے کہ گیس کی فراہمی غیر تسلی بخش ہے اور ان کے گھروں میں اکثر اوقات گیس نہیں آتی، پھر بھی سوئی گیس کے محکمہ کی طرف سے ہزاروں روپے کے بلز بھجوا دیے جاتے ہیں۔ اس صورت حال نے غریب صارفین کی زندگی مشکل بنا دی ہے۔

شہریوں کا کہنا ہے کہ رواں ہفتے سوئی گیس کے صارفین کو گزشتہ ماہ کے بھاری بلز موصول ہوئے، جنہیں دیکھ کر شہری دنگ رہ گئے۔ غریب لوگ ایک دوسرے سے بلز کے بارے میں پوچھتے اور اپنے ہمسایوں سے مشورہ کرتے نظر آئے۔

کاروباری افراد اور ہوٹل مالکان کو بھی لاکھوں روپے کے سوئی گیس بلز موصول ہوئے ہیں، جس نے انہیں بھی پریشان کر دیا۔ ان کا کہنا ہے کہ گیس کی فراہمی دن میں چار گھنٹے سے زیادہ تسلسل سے نہیں ہوتی، جس سے چولہے ٹھنڈے رہتے ہیں، لیکن اس کے باوجود انہیں بھاری بلز ادا کرنے پڑتے ہیں۔

گھریلو صارفین کا کہنا ہے کہ مہنگائی پہلے ہی ان کی زندگی اجیرن بنا چکی ہے، اور اب سوئی گیس کے بھاری بلز نے مزید مشکلات کھڑی کر دی ہیں۔ انہوں نے حکام سے اپیل کی ہے کہ وہ غریب عوام پر رحم کریں تاکہ وہ اپنے بچوں کو دو وقت کی روٹی دے سکیں اور زندگی کی مشکلات کا سامنا نہ کریں۔