پنڈدادنخان: ڈی پی او جہلم طارق عزیز سندھو کا کھیوڑہ چائنیز گارڈ ایل سی آئی فیکٹری اور پولیس خدمت مرکز کا دورہ، سکیورٹی انتظامات اور سہولیات کا جائزہ لیا۔
تفصیلات کے مطابق ڈسٹرکٹ پولیس آفیسر جہلم طارق عزیز سندھو نے چائنیز گارڈ ایل سی آئی فیکٹری کھیوڑہ کا دورہ کیا جہاں انہوں نے چائنیز باشندوں کی رہائش گاہوں اور کام کرنے کی جگہوں کا معائنہ کیا۔ اس موقع پر ڈی ایس پی پنڈدادنخان نے ڈی پی او جہلم کو سیکیورٹی انتظامات پر تفصیلی بریفنگ دی۔
ڈی پی او جہلم نے کہا کہ غیر ملکی باشندے خصوصاً چائنیز مہمان ہمارے لیے وی آئی پی حیثیت رکھتے ہیں، ان کی سیکیورٹی کو ہر حال میں یقینی بنایا جائے گا اور اس میں کسی قسم کی غفلت یا کوتاہی برداشت نہیں کی جائے گی۔ انہوں نے واضح کیا کہ غیر ملکیوں کو محفوظ اور پرامن ماحول فراہم کرنا جہلم پولیس کی اولین ترجیح ہے تاکہ ملکی تشخص کو بہتر بنایا جا سکے۔
بعدازاں ڈی پی او جہلم نے پولیس خدمت مرکز پنڈدادنخان کا بھی دورہ کیا جہاں دفتر کے ریکارڈ، سٹاف کی کارکردگی اور عمارت کی صفائی کا تفصیلی جائزہ لیا۔ ڈی پی او جہلم نے عملے کو ہدایت کی کہ شہریوں کے ساتھ خوش اخلاقی سے پیش آئیں اور حکومت پنجاب کے ویژن کے مطابق شہریوں کو تمام سہولیات بروقت مہیا کی جائیں۔
انہوں نے کہا کہ پولیس دفاتر میں صفائی ستھرائی اور سروس ڈلیوری کو مزید بہتر بنایا جائے گا اور پولیس فارمیشنز کی کارکردگی کو جانچنے کے لیے سرپرائز وزٹس کا سلسلہ جاری رہے گا۔
-
-
-
-
