پٹرولنگ پولیس کی کارروائیاں، اشتہاری قاتل سمیت متعدد ملزمان گرفتار، گمشدہ خاتون کو لواحقین سے ملا دیا

1

سوہاوہ: پٹرولنگ پولیس راولپنڈی ریجن کی جرائم پیشہ عناصر کے خلاف موثر کارروائیاں جاری، قتل کے اشتہاری مجرم سمیت متعدد ملزمان گرفتار، گمشدہ خاتون کولواحقین کے حوالے کر دیا گیا۔

تفصیلات کے مطابق ایس ایس پی محمد بن اشرف کی زیر قیادت پٹرولنگ پولیس راولپنڈی ریجن نے جرائم پیشہ عناصر کے خلاف کارروائیاں مزید تیز کر دی ہیں۔ پٹرولنگ پوسٹ شاہ خاکی کے اے ایس آئی حماد افضل اور ان کی ٹیم نے کارروائی کرتے ہوئے علاقہ تھانہ چونترہ (راولپنڈی) کے مقدمہ قتل میں مطلوب اشتہاری مجرم صدام حسین ولد گل پرخان سکنہ ضلع خیبر کو گرفتار کر لیا۔

پٹرولنگ پوسٹ بھون کے اے ایس آئی عمران رشید نے ذہنی طور پر غیر مستحکم ایک بزرگ خاتون کو پریشان حالت میں پایا، جو اپنے گھر کا راستہ بھول چکی تھیں۔ خاتون کے ورثاء کو تلاش کر کے انہیں بحفاظت ان کے بیٹے کے حوالے کیا گیا۔ اس اقدام پر ورثاء نے پٹرولنگ پولیس کا شکریہ ادا کیا۔

اسی طرح، پٹرولنگ پوسٹ گھیلاں کلاں کے سب انسپکٹر ذیشان محمود نے دوران ڈیوٹی گمشدہ موبائل فون اس کے مالک تک پہنچایا۔ مزید کارروائیوں میں ایک اشتہاری مجرم نواب خان ولد سردار خان اور ایک عدالتی مفرور ذیشان ولد شفیق سکنہ فتح جنگ کو گرفتار کر کے جیل منتقل کر دیا گیا۔ مدعی مقدمہ نے پٹرولنگ پولیس کی کارکردگی پر اطمینان اور خوشی کا اظہار کیا۔