گورنمنٹ گریجویٹ کالج ٹاہلیانوالہ میں ایم ڈی کیٹ 2025 کے داخلے بغیر فیس کے شروع

جہلم: گورنمنٹ آف پنجاب ہائر ایجوکیشن ڈیپارٹمنٹ کے تحت گورنمنٹ گریجویٹ کالج ٹاہلیانوالہ جہلم میں ایم ڈی کیٹ (MD CAT) 2025 کے داخلے بغیر کسی فیس کے باضابطہ طور پر شروع ہو چکے ہیں۔ یہ اقدام میڈیکل کے شعبے میں کیریئر بنانے کے خواہشمند طلبہ و طالبات کے لیے ایک شاندار موقع فراہم کرتا ہے۔

ڈپٹی ڈائریکٹر (کالجز) پروفیسر حماد رضا اعوان نے طلبہ و طالبات سے خطاب کرتے ہوئے کہا کہ ایم ڈی کیٹ میں داخلہ حاصل کرنا میڈیکل کے شعبے میں کامیاب مستقبل کی ضمانت ہے۔ انہوں نے والدین پر زور دیا کہ وہ اپنے بچوں کو میڈیکل کے شعبے میں نمایاں مقام دلانے کے لیے اس سنہری موقع سے فائدہ اٹھائیں اور ایم ڈی کیٹ میں بروقت داخلہ کروائیں۔

پروفیسر حماد رضا نے مزید کہا کہ حکومت پنجاب کی یہ کاوش نہ صرف تعلیمی میدان میں انقلاب برپا کر رہی ہے بلکہ غریب اور متوسط طبقے کے طلبہ و طالبات کے لیے بھی مواقع کے دروازے کھول رہی ہے۔ انہوں نے طلبہ کو مشورہ دیا کہ وہ ایم ڈی کیٹ کے حوالے سے مزید معلومات اور رہنمائی کے لیے کالج کیمپس کا وزٹ کریں تاکہ تمام تر تفصیلات براہِ راست حاصل کی جا سکیں۔