کھیوڑہ سے چوآسیدن شاہ کنکریٹ روڈ چند ماہ بعد ٹوٹ پھوٹ کا شکار

12

پنڈدادنخان: کھیوڑہ سے چوآسیدنشاہ پہاڑی ایریا میں نئی تعمیر ہونے والی کنکریٹ روڈ افتتاح کے چند ماہ بعد ہی ٹوٹ پھوٹ کا شکار ہونا شروع ہوگئی ہے۔

تقریباً اڑھائی کلومیٹر طویل اس سڑک پر 126 اعشاریہ 550 ملین روپے کی خطیر رقم خرچ کی گئی تھی، لیکن مختلف حصوں میں دراڑیں پڑنے اور کناروں پر شولڈر کا کام نامکمل چھوڑنے کے بعد ٹھیکیدار کے غائب ہونے سے قومی خزانے کے ضیاع پر سوالات پیدا ہوگئے ہیں۔

مقامی عوام اور سماجی حلقوں کا کہنا ہے کہ سڑک کے کئی حصے زمین بوس ہو چکے ہیں اور مختلف مقامات پر دراڑیں روز بروز بڑھ رہی ہیں۔ شہریوں نے خدشہ ظاہر کیا ہے کہ اگر بروقت مرمتی اقدامات نہ کیے گئے تو یہ سڑک چند ماہ میں مکمل طور پر ناقابلِ استعمال ہو جائے گی۔

علاقہ مکینوں نے ڈپٹی کمشنر جہلم اور اسسٹنٹ کمشنر پنڈدادنخان سے فوری نوٹس لینے کا مطالبہ کرتے ہوئے کہا کہ ٹھیکیدار اور محکمہ ہائی وے کے ذمہ دار افسران کے خلاف سخت کارروائی عمل میں لائی جائے۔ شہریوں کا مؤقف ہے کہ شولڈر ادھورا چھوڑنا، کنکریٹ میں جلدی کریکس آنا اور ناقص معیار کے مواد کا استعمال واضح طور پر غفلت اور بدانتظامی کو ظاہر کرتا ہے، جس سے قومی خزانے کو بھاری نقصان پہنچا ہے۔

عوامی حلقوں نے اعلیٰ حکام سے یہ بھی مطالبہ کیا ہے کہ منصوبے کا تکنیکی آڈٹ کرایا جائے، ذمہ داران کے خلاف محکمانہ کارروائی کی جائے اور ادھورا چھوڑا گیا کام فوری مکمل کرایا جائے تاکہ علاقے کے شہری محفوظ اور معیاری سڑک سے مستفید ہو سکیں۔