موٹر سائیکل سواروں کے لیے موٹر وے پولیس کی خصوصی آگاہی و نفاذی مہم جاری
دینہ: جہلم میں موٹر سائیکل سواروں کی جان و مال کے تحفظ اور ٹریفک قوانین کی پاسداری کو یقینی بنانے کے لیے نیشنل ہائی ویز اینڈ موٹر وے پولیس کی خصوصی آگاہی مہم تسلسل کے ساتھ جاری ہے۔ یہ مہم آئی جی نیشنل ہائی ویز اینڈ موٹر وے پولیس سلطان احمد چوہدری کے خصوصی احکامات کی روشنی میں سیکٹر این فائیو نارتھ-ٹو جہلم میں چلائی جا رہی ہے۔
اس آگاہی اور نفاذی مہم کی نگرانی سیکٹر کمانڈر نارتھ ٹو جہلم زاہد نذیر کر رہے ہیں۔ مہم کا بنیادی مقصد نوجوانوں اور موٹر سائیکل سواروں میں ٹریفک قوانین کی پابندی، حفاظتی اقدامات کی اہمیت اور سڑکوں پر حادثات کی روک تھام کے حوالے سے شعور اجاگر کرنا ہے۔
مہم کے دوران موٹر وے پولیس کی ٹیمیں ٹول پلازہ مندرہ، سوہاوہ اور جہلم پر تعینات ہیں، جہاں موٹر سائیکل سواروں کو براہِ راست بریفنگ دی جا رہی ہے۔ اس کے ساتھ ساتھ ٹول پلازوں پر آگاہی بینرز آویزاں کیے گئے ہیں اور پمفلٹس تقسیم کیے جا رہے ہیں تاکہ ہر آنے جانے والا شہری اور موٹر سائیکل سوار حفاظتی ہدایات اور ٹریفک قوانین سے مکمل آگاہی حاصل کر سکے۔
اس خصوصی مہم کے تحت اسکولوں، کالجز اور دیگر عوامی مقامات پر سیمینارز، بریفنگ سیشنز اور آگاہی واکس کا بھی انعقاد کیا گیا۔ ان سرگرمیوں میں ہیلمٹ کے لازمی استعمال، اوور اسپیڈنگ سے گریز، ون وے قوانین کی پابندی، سائیڈ ویو مررز کے استعمال، موٹر سائیکل کی فٹنس، ڈرائیونگ لائسنس کی موجودگی، مسافروں کی حفاظت اور دورانِ ڈرائیونگ موبائل فون کے استعمال سے اجتناب کے حوالے سے تفصیلی رہنمائی فراہم کی گئی۔
یہ مہم بیٹ 5 مندرہ، بیٹ 6 سوہاوہ اور بیٹ 7 سرائے عالمگیر میں بھی جاری ہے، جہاں موٹر وے پولیس کی ٹیمیں قوانین کے نفاذ کے ساتھ ساتھ خلاف ورزی کرنے والے موٹر سائیکل سواروں کے خلاف سخت کارروائیاں عمل میں لا رہی ہیں تاکہ ٹریفک قوانین کی مکمل پاسداری کو یقینی بنایا جا سکے۔
اس موقع پر سیکٹر کمانڈر ایس پی زاہد نذیر نے عوام، والدین اور طلباء سے اپیل کی کہ وہ حفاظتی اقدامات کو اپنی روزمرہ زندگی کا حصہ بنائیں، ہیلمٹ کا لازمی استعمال کریں، بغیر لائسنس ڈرائیونگ سے گریز کریں اور ٹریفک قوانین کی مکمل پابندی کریں تاکہ اپنی اور دوسروں کی جانوں کو محفوظ بنایا جا سکے۔
انہوں نے کہا کہ موٹر سائیکل سواروں میں محفوظ، ذمہ دار اور قانون کے مطابق ڈرائیونگ کے فروغ کے لیے یہ آگاہی مہم آئندہ بھی جاری رہے گی۔
