سوہاوہ میں الیکٹرونکس شاپ سے لاکھوں کی چوری، کار سوار چور قیمتی الیکٹرانک اشیاء لے اڑے
سوہاوہ میں رمضان المبارک کے دوران چور متحرک، الیکٹرونکس شاپ سے چور لاکھوں روپے مالیت کی قیمتی الیکٹرانک اشیاء لے اُڑے۔
تفصیلات کے مطابق رمضان المبارک کے مقدس مہینے میں بھی چوری کی وارداتوں کا سلسلہ تھم نہ سکا۔ جہلم کی تحصیل سوہاوہ میں جی ٹی روڈ کے مصروف ترین چوک سوہاوہ چکوال موڑ کے قریب قائم ایک الیکٹرونکس شاپ میں سحری کے وقت لاکھوں روپے مالیت کی قیمتی الیکٹرانک اشیاء چوری کر لی گئیں۔
نامعلوم چوروں نے سحری کے اوقات میں دوکان کے تالے توڑنے کے بعد شیشے کا دروازہ بھی توڑ ڈالا اور دوکان میں موجود چھوٹے سائز کی قیمتی الیکٹرانک اشیاء سمیٹ کر فرار ہو گئے۔ ذرائع کے مطابق واردات کے دوران کار میں سوار دو چور موقع پر موجود تھے، جبکہ ایک لوڈر رکشہ بھی سی سی ٹی وی فوٹیج میں کار کے ساتھ نظر آ رہا ہے۔
واقعے کی اطلاع ملتے ہی تھانہ سوہاوہ پولیس اور فرانزک ٹیم موقع پر پہنچ گئی، جہاں شواہد اکٹھے کر کے تفتیش کا باقاعدہ آغاز کر دیا گیا ہے۔ پولیس کا کہنا ہے کہ سی سی ٹی وی فوٹیج کی مدد سے ملزمان کی شناخت کی جا رہی ہے اور جلد چوروں کو گرفتار کر لیا جائے گا۔
شہریوں نے رمضان المبارک کے دوران بڑھتی ہوئی وارداتوں پر تشویش کا اظہار کرتے ہوئے مطالبہ کیا ہے کہ رات اور سحری کے اوقات میں گشت کو مزید مؤثر بنایا جائے تاکہ چوری اور ڈکیتی کی وارداتوں کا سدباب ہو سکے۔
