ضلع جہلم میں بارش کا سلسلہ جاری، سردی کی لہر برقرار، عید پر بھی بادل برسنے کا امکان
جہلم/ سوہاوہ: ضلع جہلم کی چاروں تحصیلوں میں دوسرے روز بھی وقفے وقفے سے بارش کا سلسلہ جاری ہے جس کے باعث موسم میں خنکی بڑھ گئی ہے اور سردی کی لہر برقرار ہے۔
محکمہ موسمیات کے مطابق آئندہ چند روز کے دوران مزید بارشوں کا امکان ہے جبکہ عید الفطر کے موقع پر بھی بادل برسنے کی پیش گوئی کی گئی ہے۔
بارش کے باعث جہاں موسم خوشگوار ہو گیا ہے وہیں نشیبی علاقوں میں پھسلن اور سردی کی شدت میں اضافے کے باعث شہریوں کے معمولاتِ زندگی بھی متاثر ہوئے ہیں۔ دوسری جانب کاشتکاروں کے مطابق یہ بارش فصلوں کے لیے ملے جلے اثرات کی حامل ہو سکتی ہے۔
ادھر ڈومیلی، بڑاگواہ اور گردونواح کے علاقوں میں بھی دوسرے روز وقفے وقفے سے ہلکی بارش کا سلسلہ جاری رہا جس کے باعث علاقے میں ٹھنڈک میں اضافہ ہو گیا اور رخصت ہوتی سردی ایک بار پھر لوٹ آئی۔
ڈومیلی، بڑاگواہ، پدھری، پھڈیال، نگیال، بنگیال، گتر، جنڈالہ، اڈرانہ، ججیال اور مغل آباد سمیت دیگر علاقوں میں بھی بارش وقفے وقفے سے جاری رہی۔ محکمہ موسمیات کے مطابق خطے میں مزید بارشوں کا امکان ہے اور آئندہ چند روز تک یہ سلسلہ جاری رہ سکتا ہے۔
