جہلم کی سڑکوں پر آوارہ مویشیوں کا راج، حادثات میں اضافہ، شہری پریشان
جہلم شہر کی مصروف سڑکوں پر آوارہ مویشیوں کا قبضہ بڑھنے لگا ہے، جس کے باعث ٹریفک حادثات میں اضافہ اور شہریوں کو شدید مشکلات کا سامنا ہے جبکہ میونسپل کمیٹی کا عملہ صورتحال پر قابو پانے میں ناکام دکھائی دیتا ہے۔
سول لائن روڈ سمیت شہر کی اہم شاہراہوں پر آوارہ مویشی کھلے عام گھومتے نظر آتے ہیں، جو نہ صرف ٹریفک کی روانی متاثر کر رہے ہیں بلکہ موٹر سائیکل سواروں اور چھوٹی گاڑیوں کے لیے خطرہ بھی بن چکے ہیں۔ سڑکوں پر مویشیوں کی موجودگی کے باعث جگہ جگہ گوبر اور گندگی بھی پھیل رہی ہے۔
شہریوں عمر ملک، انیق، محمد اویس، آصف جنجوعہ اور حنیف سمیت دیگر نے بتایا کہ وہ متعدد بار میونسپل کمیٹی کو شکایات درج کرا چکے ہیں، مگر تاحال کوئی مؤثر کارروائی نہیں کی گئی۔
شہریوں کا کہنا ہے کہ میونسپل کمیٹی کا عملہ آوارہ مویشیوں کو قابو کرنے اور انہیں سرکاری پھاٹک میں منتقل کرنے میں ناکام ہے، جس کے باعث مسائل روز بروز بڑھتے جا رہے ہیں۔
اہلیانِ شہر نے اعلیٰ حکام سے مطالبہ کیا ہے کہ فوری نوٹس لے کر آوارہ مویشیوں کے خلاف مؤثر کارروائی کی جائے تاکہ شہریوں کو درپیش مشکلات اور حادثات کے خطرات کا خاتمہ ممکن بنایا جا سکے۔
