سوہاوہ میں ایمرجنسی 15 پر مبینہ جھوٹی اطلاع دینے والا شخص گرفتار

سوہاوہ پولیس نے ایمرجنسی 15 پر مبینہ طور پر جھوٹی اطلاع دینے والے شخص کے خلاف کارروائی کرتے ہوئے اسے گرفتار کر لیا اور مقدمہ درج کر کے مزید قانونی کارروائی کا آغاز کر دیا۔

ترجمان جہلم پولیس کے مطابق جہلم کی تحصیل سوہاوہ میں ملزم نے ایمرجنسی 15 پر کال کر کے اطلاع دی کہ چند افراد نے ناجائز اسلحہ کے زور پر اسے جان سے مارنے کی کوشش کی ہے۔ اطلاع ملتے ہی ایس ایچ او تھانہ سوہاوہ اپنی ٹیم کے ہمراہ فوری طور پر موقع پر پہنچے، تاہم ابتدائی جانچ کے دوران اطلاع مبینہ طور پر بے بنیاد اور غلط ثابت ہوئی۔

پولیس کے مطابق ملزم نے جھوٹی اطلاع دے کر قانون نافذ کرنے والے اداروں کا قیمتی وقت ضائع کیا، سرکاری وسائل کے غیر ضروری استعمال کا باعث بنا اور پولیس کو گمراہ کرنے کی کوشش کی، جس پر اس کے خلاف قانونی کارروائی کرتے ہوئے مقدمہ درج کر لیا گیا۔

ڈسٹرکٹ پولیس آفیسر (ڈی پی او) جہلم شفیق احمد چوہدری نے کہا کہ ایمرجنسی 15 عوام کی فوری مدد، جان و مال کے تحفظ اور ہنگامی حالات میں بروقت امداد فراہم کرنے کے لیے ایک اہم سروس ہے۔ انہوں نے کہا کہ اس سروس پر جھوٹی یا بے بنیاد اطلاع دے کر سرکاری وسائل کا ضیاع کرنے والے عناصر کے خلاف بلاامتیاز قانونی کارروائی عمل میں لائی جائے گی۔

انہوں نے شہریوں سے اپیل کی کہ ایمرجنسی سروسز کا ذمہ داری کے ساتھ استعمال کریں اور صرف حقیقی ہنگامی صورتحال میں ہی ایمرجنسی 15 پر رابطہ کریں تاکہ ضرورت مند افراد کو بروقت امداد فراہم کی جا سکے۔