جہلم: سعودی عرب پر عراقی سرزمین سے حملہ پس پردہ دشمن کی ناپاک سازش ہے، حافظ عبدالحمید عامر

جہلم: حافظ عبدالحمید عامر نے کہا ہے کہ پاکستان اور سعودی عرب کے تعلقات تاریخی، مذہبی اور برادرانہ بنیادوں پر استوار ہیں، جنہیں کسی بھی سازش کے ذریعے کمزور نہیں کیا جا سکتا۔

جامعہ علوم اثریہ جہلم کے مہتمم، قائد تحفظ حرمین شریفین موومنٹ پاکستان اور مرکزی جمعیت اہل حدیث پاکستان کے نائب امیر حافظ عبدالحمید عامر نے اپنے ایک بیان میں سعودی عرب کے خلاف حالیہ حملوں کی مذمت کرتے ہوئے کہا کہ سعودی عرب کی آئل تنصیبات پر ہونے والے حالیہ ڈرون حملے کے پسِ پردہ دشمن عناصر کارفرما ہیں۔ انہوں نے کہا کہ ان کے نزدیک ایسے حملوں کا مقصد خطے میں کشیدگی کو بڑھانا اور سعودی عرب کو عدم استحکام سے دوچار کرنا ہے۔

انہوں نے کہا کہ سعودی عرب کو اپنی خودمختاری، قومی سلامتی اور اہم تنصیبات کے دفاع کا مکمل حق حاصل ہے۔ ان کے مطابق خطے کی موجودہ صورتحال نہایت حساس ہے اور ایسے اقدامات امن و استحکام کے لیے نقصان دہ ثابت ہو سکتے ہیں۔

حافظ عبدالحمید عامر نے مزید کہا کہ ارضِ حرمین شریفین کا تحفظ ہر مسلمان کے لیے انتہائی اہمیت رکھتا ہے اور پاکستان و سعودی عرب کے درمیان برادرانہ تعلقات کئی دہائیوں پر محیط ہیں۔ ان کے بقول دونوں ممالک نے مختلف مواقع پر ایک دوسرے کا ساتھ دیا ہے اور باہمی تعاون کی یہ روایت مستقبل میں بھی برقرار رہنی چاہیے۔

انہوں نے اپنے بیان میں کہا کہ پاکستانی عوام کے دل حرمین شریفین کی محبت سے سرشار ہیں اور وہ سعودی عرب کی سلامتی، استحکام اور امن کے لیے نیک خواہشات رکھتے ہیں۔