سوہاوہ میں افسوسناک حادثہ، سڑک عبور کرتے ہوئے پانچ سالہ بچہ مسافر بس کی ٹکر سے جاں بحق

سوہاوہ میں جی ٹی روڈ پر بس کی ٹکر سے سڑک عبور کرنے والا پانچ سالہ بچہ جاں بحق ہو گیا۔

تفصیلات کے مطابق جہلم کی تحصیل سوہاوہ میں مین اسٹاپ شیل پٹرول پمپ کے قریب پیش آنے والے ایک افسوسناک ٹریفک حادثے میں سڑک عبور کرنے والا پانچ سالہ بچہ مسافر بس کی ٹکر لگنے سے جاں بحق ہو گیا۔

ریسکیو 1122 کے مطابق حادثہ اس وقت پیش آیا جب راولپنڈی سے لاہور جانے والی مسافر بس نے سڑک عبور کرتے ہوئے ایک بچے کو ٹکر مار دی، جس کے نتیجے میں بچہ موقع پر ہی دم توڑ گیا۔

واقعے کی اطلاع ملتے ہی ریسکیو 1122 کی ٹیم فوری طور پر جائے وقوعہ پر پہنچ گئی۔ ریسکیورز نے ضروری قانونی کارروائی کے بعد جاں بحق ہونے والے بچے کی میت تحصیل ہیڈکوارٹر (THQ) ہسپتال سوہاوہ منتقل کر دی۔

ریسکیو حکام کے مطابق جاں بحق ہونے والے بچے کی شناخت احد ولد تنویر کے نام سے ہوئی ہے۔