جہلم میں ایل پی جی سرکاری نرخ سے دگنی قیمت پر فروخت ہونے کا انکشاف

جہلم: ضلع جہلم میں ایل پی جی کی سرکاری قیمت میں حالیہ کمی کے باوجود متعدد علاقوں میں مبینہ طور پر گراں فروشی کا سلسلہ جاری ہے۔

تفصیلات کے مطابق حکومت کی جانب سے ایل پی جی کی قیمت میں 67 روپے فی کلو کمی کے بعد سرکاری نرخ 241 روپے فی کلو مقرر کیا گیا ہے، تاہم جہلم، دینہ، سوہاوہ اور پنڈدادنخان سمیت ضلع بھر میں متعدد دکاندار مبینہ طور پر ایل پی جی 450، 500 اور 525 روپے فی کلو تک فروخت کر رہے ہیں۔

شہریوں نے الزام عائد کیا ہے کہ سرکاری نرخنامے پر عملدرآمد نہ ہونے کے باعث گھریلو صارفین کو مہنگے داموں ایل پی جی خریدنے پر مجبور کیا جا رہا ہے۔

شہریوں کا کہنا ہے کہ ایل پی جی فروخت کرنے والے بعض دکاندار اپنی مرضی کے نرخ وصول کر رہے ہیں، جس کے باعث گھریلو صارفین، خصوصاً کم آمدنی اور دیہاڑی دار طبقہ شدید مالی مشکلات کا شکار ہے۔ ان کا کہنا ہے کہ سوئی گیس کی قلت اور لوڈشیڈنگ کے باعث بیشتر گھروں کا انحصار ایل پی جی پر ہے، مگر ناجائز منافع خوری نے عوام کی مشکلات میں مزید اضافہ کر دیا ہے۔

متاثرہ شہریوں نے مطالبہ کیا ہے کہ بازاروں میں سرکاری نرخناموں پر سختی سے عملدرآمد یقینی بنایا جائے، دکانوں کی باقاعدہ چیکنگ کی جائے اور زائد نرخ وصول کرنے والے عناصر کے خلاف بلاامتیاز قانونی کارروائی عمل میں لائی جائے۔

شہریوں نے وزیراعلیٰ پنجاب مریم نواز شریف، چیف سیکرٹری پنجاب، کمشنر راولپنڈی، ڈپٹی کمشنر جہلم اور متعلقہ اداروں سے فوری نوٹس لینے کی اپیل کرتے ہوئے کہا ہے کہ ایل پی جی کی سرکاری قیمت 241 روپے فی کلو پر عملدرآمد یقینی بنایا جائے تاکہ گراں فروشی کا خاتمہ ہو اور عوام کو حقیقی ریلیف مل سکے۔