عام انتخابات کیلئے اسکروٹنی کا مرحلہ مکمل، جہلم سے کتنے امیدواروں کے کاغذات مسترد اور منظور ہوئے؟

جہلم: عام انتخابات کے لیے مختلف اہم شخصیات کے کاغذات نامزدگی مسترد کردیے گئے، کاغذات نامزدگی منظور یا مسترد ہونے کی حتمی لسٹیں آویزاں کر دی گئی ہیں ۔

ضلع جہلم کی دو قومی اور تین صوبائی اسمبلی کی نشستوں سے امیدواروں کے 138 کاغذات نامزدگی منظور اور 31 امیدواروں کے کاغذات نامزدگی مسترد کر دیے گئے۔

قومی اسمبلی کے حلقہ این اے 60 جہلم ون سے 12 امیدواروں جن میں سابق وفاقی وزیر فواد چوہدری، سابق وفاقی وزیر چوہدری شہباز حسین، ن لیگی امیدوار مہر فیاض، تحریک لبیک کے عاصم اشفاق، سابق ایم پی اے سبرینہ جاوید، رخسار علی، سابق پی ٹی آئی ایم پی اے چوہدری ظفر اقبال، سید رفعت محمود، ندیم چوہدری قربان اور راجہ سفیر شامل ہیں کے کاغذات کے مسترد کر دیا گیا۔

حلقہ این اے 60 جہلم ون سے الیکشن کمیشن کے ریٹرننگ افسر نے چوہدری فرخ الطاف، بلال اظہر کیانی، چوہدری ندیم خادم، چوہدری زاہد اختر سمیت 22 امیدواروں کے کاغذات کو منظور کر لیا۔

حلقہ این اے 61 جہلم ٹو سے سابق وفاقی وزیر فواد چوہدری اور ان کی اہلیہ حبا فواد کے کاغذات نامزدگی مسترد کر دیے گئے۔ تحریک انصاف کے امیدوار میجر فیض احمد فیض، سابق ایم پی اے راحیلہ مہدی اور ان کے شوہر انور آفریدی کے کاغذات نامزدگی بھی مسترد کر دیے۔

حلقہ این اے 61 جہلم ٹو سے نوابزادہ مطلوب مہدی، فیصل چوہدری، ندیم خادم، چوہدری فرخ الطاف، عابد اشرف جوتانہ سمیت 19 امیدواروں کے کاغذات نامزدگی منظور کر لئے گئے۔

جہلم کی صوبائی اسمبلی کی نشست حلقہ پی پی 24 جہلم ون سے ن لیگ کے سابق ایم پی اے مہر فیاض سمیت 8 امیدواروں چوہدری فوق شیرباز، سید رفعت محمود،حسن عدیل،رخسار علی، راجہ سفیر اکبر،واجدالرحمان،سعدیہ خان کے کاغذات نامزدگی مسترد کر دیے گئے۔

حلقہ پی پی 24 جہلم ون سے چوہدری ندیم خادم، راجہ یاور کمال، سبرینہ جاوید، ظفر اقبال، قاسم محمود، راجہ اویس خالد سمیت 32 امیدواروں کے کاغذات نامزدگی منظور کر لئے گئے۔

حلقہ پی پی 25 جہلم ٹو سے پی ٹی آئی کے سابق ایم پی ایز ظفر اقبال اور راحیلہ مہدی سمیت 5 امیدواروں سیدہ صباحت، چوہدری آصف محمود، پی ٹی آئی کے سابق ضلعی صدر چوہدری زاہد اختر کے کاغذات مسترد ہوگئے۔

حلقہ پی پی 25 جہلم ٹو سے چوہدری لال حسین، چوہدری ندیم خادم، راشد منہاس چوہدری، چوہدری تسنیم ناصر سمیت 31 امیدواروں کے کاغذات نامزدگی منظور کر لئے گئے۔

حلقہ پی پی 26 جہلم تھری سے صرف ایک پی ٹی آئی کے امیدوار میجر فیض کے کاغذات نامزدگی ڈیول نیشنلٹی کی وجہ سے مسترد کر دیے گئے جبکہ سابق وفاقی وزیر چوہدری سالک حسین، فیصل فرید، سابق وفاقی وزیر فواد چوہدری کی اہلیہ حبا فواد، افتخار احمد شہزاد، بیرسٹر تیمور نواز، راجہ جواد احمد جالپ، سابق ایم پی اے ناصر محمود سمیت 34 امیدواروں کے کاغذات نامزدگی منظور کر لئے گئے۔