پاکستان نیشنل اسپیشل اولمپکس کے فاتح بچوں کے اعزاز میں پروقار تقریب

جہلم: پاکستان نیشنل اسپیشل اولمپکس میں شاندار کامیابی حاصل کرنے والے القاسم انسٹیٹیوٹ برائے اسپیشل بچگان، اسلام پورہ، جہلم کے باہمت اور باصلاحیت بچوں کے اعزاز میں ڈپٹی کمشنر آفس جہلم میں ایک پروقار تقریب کا انعقاد کیا گیا، جہاں قومی سطح پر نمایاں کارکردگی دکھانے والے بچوں کی حوصلہ افزائی کرتے ہوئے انہیں خصوصی اعزازات سے نوازا گیا۔

تقریب کے مہمانِ خصوصی ڈپٹی کمشنر جہلم میر رضا اوزگن تھے، جنہوں نے قومی سطح پر کامیابی حاصل کرنے والے اسپیشل بچوں کو میڈلز پہنائے، ان کی غیر معمولی صلاحیتوں، محنت اور عزم کو سراہا اور بعد ازاں بچوں کے ہمراہ کیک کاٹ کر ان کی کامیابی کا جشن منایا۔

اس موقع پر بچوں کی بہترین تربیت اور رہنمائی پر چیف ٹرینر ملک عرفان، ٹرینر محترمہ عائشہ غفور اور ٹرینر فیضان کو خصوصی تعریفی ایوارڈز سے نوازا گیا۔ تقریب میں القاسم انسٹیٹیوٹ کی پرنسپل محترمہ حنا ثاقب، ادارے کے صدر آصف ملک، ایڈمنسٹریٹر شکیل انصاری، کوآرڈینیٹر اسپیشل ایجوکیشن ضلع جہلم چوہدری تاثیر سمیت ادارے کے دیگر نمائندگان بھی شریک ہوئے۔

تقریب میں ایڈیشنل ڈپٹی کمشنر محترمہ علیزہ ریحان، ایمرجنسی آفیسر ریسکیو 1122 انجینئر سعید احمد، ایڈیشنل ڈپٹی کمشنر (سوشل ویلفیئر) محترمہ یسریٰ اور دیگر سرکاری افسران نے بھی شرکت کی۔ شرکاء نے قومی سطح پر کامیابی حاصل کرنے والے اسپیشل بچوں کو مبارکباد پیش کرتے ہوئے ان کے عزم، صلاحیتوں اور غیر معمولی کارکردگی کو زبردست خراجِ تحسین پیش کیا۔

اپنے خطاب میں ڈپٹی کمشنر میر رضا اوزگن نے القاسم انسٹیٹیوٹ برائے اسپیشل بچگان کی خدمات کو سراہتے ہوئے کہا کہ ادارے کے اساتذہ، ٹرینرز، والدین اور انتظامیہ کی انتھک محنت ہی ان بچوں کی کامیابی کی اصل بنیاد ہے۔ انہوں نے کہا کہ خصوصی بچوں کو معاشرے کا فعال اور بااعتماد حصہ بنانا ہم سب کی مشترکہ ذمہ داری ہے، اور ضلعی انتظامیہ مستقبل میں بھی ان کی تعلیم، تربیت، کھیلوں اور فلاح و بہبود کے لیے ہر ممکن تعاون جاری رکھے گی۔

اس موقع پر ادارے کے صدر آصف ملک نے ڈپٹی کمشنر جہلم اور ضلعی انتظامیہ کا شکریہ ادا کرتے ہوئے کہا کہ اسپیشل بچوں کی اس شاندار انداز میں عزت افزائی نہ صرف بچوں بلکہ ان کے والدین، اساتذہ اور ٹرینرز کے لیے بھی باعثِ فخر اور حوصلہ افزائی کا ذریعہ ہے۔

انہوں نے کہا کہ یہ اعزاز القاسم انسٹیٹیوٹ کے لیے ایک یادگار سنگِ میل ہے اور ادارہ آئندہ بھی خصوصی بچوں کی تعلیم، تربیت، کھیلوں اور شخصیت سازی کے میدان میں مزید کامیابیاں حاصل کرنے کے لیے اسی جذبے کے ساتھ اپنی خدمات جاری رکھے گا۔

تقریب کے اختتام پر قومی سطح پر نمایاں کارکردگی کا مظاہرہ کرنے والے اسپیشل بچوں کو بھرپور خراجِ تحسین پیش کیا گیا، جبکہ شرکاء نے اس عزم کا اظہار کیا کہ خصوصی افراد کی صلاحیتوں کو مزید نکھارنے اور انہیں قومی دھارے میں شامل کرنے کے لیے ایسے حوصلہ افزا اقدامات کا سلسلہ مستقبل میں بھی جاری رکھا جائے گا۔