اسمارٹ لاک ڈاؤن اور کاروباری اوقات کی پابندیاں ختم کی جائیں۔ چوہدری مظہر اقبال، مہر محمد افضل
جہلم: سبزی فروٹ منڈی کے صدر چوہدری مظہر اقبال اور مرغی بازار کے صدر مہر محمد افضل نے حکومت سے مطالبہ کیا ہے کہ لاک ڈاؤن اور کاروباری اوقات کی پابندیوں کو فوری طور پر ختم کیا جائے تاکہ تاجر برادری کو درپیش مشکلات میں کمی لائی جا سکے۔
اپنے مشترکہ بیان میں تاجر رہنماؤں نے کہا کہ گرمی کی شدت میں مسلسل اضافہ ہو رہا ہے، دن بڑے ہو چکے ہیں جبکہ عیدالاضحیٰ بھی قریب ہے۔ انہوں نے کہا کہ اس وقت مغرب کی نماز ساڑھے سات بجے ادا کی جا رہی ہے لیکن تاجروں کو رات آٹھ بجے کاروبار بند کرنے پر مجبور کیا جاتا ہے، جس سے کاروباری سرگرمیاں شدید متاثر ہو رہی ہیں۔
انہوں نے کہا کہ شدید گرمی کے باعث دن کے اوقات میں خریدار گھروں سے باہر نہیں نکلتے جبکہ شام کے وقت بازاروں کا رخ کرتے ہیں، مگر اس وقت دکانیں بند ہونا شروع ہو جاتی ہیں جس سے تاجروں اور خریداروں دونوں کو مشکلات کا سامنا کرنا پڑتا ہے۔
چوہدری مظہر اقبال کا کہنا تھا کہ لاک ڈاؤن اور کاروباری پابندیوں کے باعث تاجروں کے معاشی مسائل میں غیر معمولی اضافہ ہو چکا ہے اور متعدد تاجر بجلی، گیس اور دیگر یوٹیلیٹی بلز ادا کرنے سے بھی قاصر ہوتے جا رہے ہیں۔ انہوں نے کہا کہ امریکہ اور ایران کے درمیان کشیدگی کا بوجھ بھی پاکستان کے عوام اور تاجر برادری پر ڈالا جا رہا ہے۔
مرغی بازار کے صدر مہر محمد افضل نے حکومت سے مطالبہ کیا کہ پٹرولیم مصنوعات کی قیمتوں میں اضافے کے بجائے کمی کی جائے جبکہ بجلی اور گیس کے بلوں میں اضافے کو بھی واپس لیا جائے۔
انہوں نے مزید کہا کہ حکومت کو آئی ایم ایف کی غلامی سے نجات حاصل کرتے ہوئے عوام دوست معاشی پالیسیاں اپنانا ہوں گی تاکہ عوام اور تاجر برادری کو معاشی مشکلات سے ریلیف مل سکے اور ملک میں خوشحالی کا ماحول پیدا ہو۔
