محرم الحرام؛ وزیر اعلیٰ پنجاب کے خصوصی مشیر ذیشان ملک کا دورہ جہلم، سکیورٹی انتظامات کا جائزہ لیا
جہلم: محرم الحرام کے جلوسوں اور مجالس کے انتظامات کا جائزہ لینے کیلئے وزیر اعلیٰ پنجاب کے خصوصی مشیر ذیشان ملک کا دورہ جہلم، امن کمیٹی اور ضلعی انتظامیہ سے ملاقات، کنٹرول روم، جلوسوں کے روٹس کا جائزہ لیا، ضلع افسران کی بریفنگ پر اطمینان کا اظہار کیا۔
تفصیلات کے مطابق وزیر اعلیٰ پنجاب کے خصوصی مشیر ذیشان ملک نے ضلع جہلم کا دورہ کیا جہاں کمیٹی روم میں انہوں نے امن کمیٹی کے اراکین سے ملاقات کی اور محرم الحرام میں امن و امان کو برقرار رکھنے کے لیے تمام مسالک کے درمیان ہم آہنگی اور رواداری کے فروغ پر زور دیا جس کے بعد انہوں نے ضلعی انتظامیہ کے مرکزی کنٹرول روم کا دورہ کیا۔
ڈپٹی کمشنر جہلم سیدہ رملہ علی نے خصوصی مشیر کو کنٹرول روم کی کارکردگی بارے بریفنگ دی خصوصی مشیر برائے وزیر اعلیٰ پنجاب نے کنٹرول روم قائم کرنے کے اقدام کو سراہا۔
خصوصی مشیر برائے وزیر اعلیٰ پنجاب نے ڈپٹی کمشنر جہلم سیدہ رملہ علی اور ڈی پی او جہلم ناصر باجوہ کے ہمراہ دس محرم الحرام کے مرکزی جلوس کے آغاز اور اختتام کے راستوں کا مشاہدہ کرتے ہوئے انتظامی اور سیکورٹی پلان بارے معلومات حاصل کیں۔ انہوں نے عزاداروں اور لائسنس داروں سے ملاقات کی، امام بارگاہوں کی انتظامیہ سے ضلعی انتظامیہ کے اقدامات پر ردعمل معلوم کیا۔
اس موقع پر خصوصی مشیر ذیشان ملک نے کہاکہ سات سے دس محرم تک انتہائی اہمیت کے دن ہیں ان دنوں میں ہم نے امن و امان برقرار رکھنے کے لیے تمام اقدامات عمل میں لانے ہیں تاکہ عشرہ محرم کو احسن طریقے سے گزارا جا سکے۔ پنجاب حکومت اس حوالے سے انتہائی متحرک اور فعال ہے۔ فول پروف سکیورٹی پلان پر عملدرآمد شروع ہے پنجاب پولیس، رینجرز اور پاک فوج کے دستے اپنی ڈیوٹی پر موجود ہیں سول انتظامیہ بھی مکمل پر اپنا کردار ادا کر رہی ہے۔
