سوہاوہ میں بیٹے کی ایما پر والدین پر تشدد کرنے والے 4 ملازم گرفتار، ماں بازیاب

سوہاوہ میں بیٹے کی ایماء پر والدین پر تشدد کر کے کمرے میں بند کرنے والے 4 ملازم گرفتار کر لئے گئے، پولیس نے خاتون کو بازیاب کروایا ہے، ملزمان نے برطانیہ میں مقیم شارق نامی شخص کے کہنے پر ضعیف العمر میاں بیوی کے ساتھ ظلم کیا ہے ۔

تفصیلات کے مطابق جہلم کی تحصیل سوہاوہ میں ضعیف العمر میاں بیوی پر تشدد کرنے والے 4ملزمان زعفران، جاوید محمود، اخلاق اور بشیر کو پولیس نے گرفتار کر کے کمرے میں قید خاتون کو بازیاب کروا لیاہے۔

پولیس حکام کا کہنا ہے کہ ملزمان اسی گھر میں کام کرتے ہیں اور میاں بیوی کا بیٹا جو کہ انگلینڈ میں مقیم ہے انکے کہنے پر تشدد کروایا جاتا تھا۔

میاں بیوی نے ایف آئی آر میں موقف اختیار کیا ہے کہ ہمارے بیٹے شارق نے مار پیٹ کر کے ہم سے زبردستی زمین ہتھیا لی ہے اور انگلینڈ چلا گیا ہے۔ وہاں سے بیٹے نے گھر کے ملازمین کو کہا ہے کہ ہمیں گھر سے باہر نکالے جس پر ملازمین ہم پر تشدد کرتے اور انجکشن لگا کر کمرے میں بند کر دیتے تھے۔

متاثرہ میاں بیوی نے فون پر پولیس کو اطلاع کی، بعدازاں تھانہ سوہاوہ پولیس نے مقدمہ درج کر لیا۔