پنجاب لیگل ایڈ سیل کا قیام عوام کو بروقت اور معیاری قانونی معاونت کی فراہمی میں اہم سنگ میل ہے، اعظم کمال
جہلم: محکمہ پبلک پراسیکوشن پنجاب کے ایڈیشنل سیکرٹری اعظم کمال نے ڈسٹرکٹ پبلک پراسیکیوٹر آفس جہلم کا خصوصی دورہ کیا، جہاں انہوں نے “پنجاب لیگل ایڈ سیل” کا باقاعدہ افتتاح کیا۔
ایڈیشنل سیکرٹری کی آمد پر ڈسٹرکٹ پبلک پراسیکیوٹر جہلم ظفر اقبال کی قیادت میں افسران اور عملے نے پرتپاک استقبال کیا۔ اس موقع پر خالد محمود، غلام محی الدین، ظہیر احمد، اعتزاز احسن ممتاز، میڈم مریم حسین، نوفیر احمد اور دیگر متعلقہ افسران بھی موجود تھے۔
دورے کے دوران ایڈیشنل سیکرٹری اعظم کمال کو پراسیکیوشن نظام، دفتری امور، زیر سماعت مقدمات اور شہریوں کو فراہم کی جانے والی قانونی معاونت کے حوالے سے تفصیلی بریفنگ دی گئی۔
اپنے خطاب میں ایڈیشنل سیکرٹری اعظم کمال نے کہا کہ حکومتِ پنجاب وزیر اعلیٰ پنجاب مریم نواز شریف کے ویژن کے مطابق محکمہ پبلک پراسیکوشن کی استعداد کار میں بہتری اور شہریوں کو بروقت انصاف کی فراہمی کے لیے عملی اقدامات کر رہی ہے۔
انہوں نے کہا کہ “پنجاب لیگل ایڈ سیل” کا قیام عوام کو قانونی معاونت کی سہولیات فراہم کرنے کی جانب ایک اہم پیش رفت ہے، جس سے مستحق شہریوں کو بہتر قانونی رہنمائی اور معاونت میسر آ سکے گی۔
اعظم کمال نے جہلم پراسیکیوشن ٹیم کی کارکردگی کو سراہتے ہوئے اس عزم کا اظہار کیا کہ پراسیکیوشن کے نظام کو مزید مؤثر، شفاف اور جدید خطوط پر استوار کیا جائے گا تاکہ شہریوں کو بروقت اور معیاری انصاف کی فراہمی یقینی بنائی جا سکے۔
