ڈومیلی میں میٹرک امتحانات شفاف اور پرامن ماحول میں جاری، نقل کی روک تھام کے سخت انتظامات

سوہاوہ: راولپنڈی بورڈ کے زیرِ اہتمام ضلع جہلم اور بالخصوص علاقہ ڈومیلی میں دسویں جماعت کے سالانہ امتحانات کامیابی سے جاری ہیں، جہاں شفافیت اور امن و امان کو یقینی بنانے کے لیے مؤثر اقدامات کیے گئے ہیں۔

جہلم کی تحصیل سوہاوہ کے علاقہ ڈومیلی میں مجموعی طور پر 6 امتحانی مراکز قائم کیے گئے ہیں، جن میں گورنمنٹ بوائز ہائی سکول مغل آباد، گورنمنٹ بوائز ہائی سکول جنڈالہ، گورنمنٹ گرلز ہائر سیکنڈری سکول ڈومیلی، گورنمنٹ بوائز ہائر سیکنڈری سکول ڈومیلی، گورنمنٹ بوائز ہائی سکول بڑاگواہ اور گورنمنٹ گرلز ہائی سکول بڑاگواہ شامل ہیں۔

مغل آباد اور جنڈالہ میں بوائز و گرلز کے مشترکہ جبکہ ڈومیلی اور بڑاگواہ میں علیحدہ علیحدہ مراکز قائم کیے گئے ہیں۔

انتظامیہ کی جانب سے نقل کی روک تھام کے لیے زیرو ٹالرنس پالیسی اپنائی گئی ہے۔ امتحانی مراکز کی مانیٹرنگ سی سی ٹی وی کیمروں کے ذریعے کی جا رہی ہے جبکہ تعلیمی بورڈ کی خصوصی ٹیمیں اچانک دورے کر کے امتحانی عمل کا جائزہ لے رہی ہیں۔

حکام کے مطابق اب تک کسی بھی مرکز پر کوئی ناخوشگوار واقعہ پیش نہیں آیا اور طلبہ پرامن ماحول میں یکسوئی کے ساتھ اپنے امتحانات دے رہے ہیں، جو انتظامیہ کے مؤثر اقدامات کا ثبوت ہے۔