جہلم میں چند منٹوں کی بارش کے بعد گرمی اور حبس کی شدت میں اضافہ
جہلم شہر سمیت ضلع بھر میں بارش کھل کر نہ برسی، گزشتہ ہفتے ہونے والی چند منٹوں کی بارش کیوجہ سے شہر و مضافاتی علاقوں میں گرمی اور حبس کی شدت میں اضافہ ہو گیا۔ گرمی اور حبس کے باعث خواتین، بچے ، بوڑھے ، نوجوان حتیٰ کہ چرند پرندبھی بے حال دکھائی دیتے ہیں ۔
محکمہ موسمیات کے مطابق شہر اور گردونواح میں 44 ڈگری سینٹی گریڈ درجہ حرارت شہریوں کو متاثر کرتا رہا، شدید حبس اور گرمی کے سبب معمولات زندگی شدید متاثر ہوکر رہ گئے، علی الصبح سے ہی گرمی اپنے تیور دکھانے شروع کردیتی ہے جو رات گئے تک جاری برقرار رہتی ہے ۔
سخت گرمی کیوجہ سے شہر کی سڑکیں اور گلیاں ویران ہوجاتی ہیں ، شہری سایہ دار اور ٹھنڈی جگہوں کا انتخاب کرتے ہوئے بارش اور گرمی کی شدت کم ہونے کا انتظار کرتے دکھائی دیتے ہیں جبکہ گرمی کے سبب مشروبات کی مانگ میں اضافہ ہونے کے ساتھ ساتھ سولر پلیٹوں ایئر کولرز سمیت پیڈسٹل فینز اور اے سی کی خریداری میں اضافہ دکھائی دیا جبکہ ڈاکٹرز کی جانب سے شہریوں کو گرمی سے بچنے اور پانی کے زیادہ استعمال کا مشورہ دیا جا رہا ہے،دوسری جانب شہر کے مختلف علاقوں میں بجلی اور گیس کی بندش نے بھی عوامی مشکلات میں اضافہ کررکھا ہے۔
شہریوں کا کہنا ہے کہ بجلی و سوئی گیس کی بندش کے باوجود بھاری بلزصارفین کیلئے وبال جان بنے ہوئے ہیں حکومت کی جانب سے عوام کو کسی قسم کا ریلیف فراہم نہیں کیا جارہا۔
شہریوں کا کہنا ہے کہ آئی ایم ایف کے قرضے اتارنے کے لئے حکمرانوں نے اپنی عیاشیوں میں اضافہ جبکہ غریب عوام پر ٹیکسز کا بوجھ لاد دیا ہے جس کیوجہ سے غریب ، سفید پوش ، متوسط طبقہ سے تعلق رکھنے والے افراد شدید متاثر ہورہے ہیں۔
