جہلم میں قصاب کی دوکان سے 8 من سے زائد مضر صحت گوشت اور چربی سے تیار کردہ ناقص گھی برآمد

جہلم میں پنجاب فوڈ اتھارٹی نے قصاب کی دوکان پر کارروائی کرتے ہوئے مضرصحت اور بدبودار گوشت جبکہ چربی سے تیار کردہ ناقص گھی برآمد کر کے کر تلف کردیا، قصاب کی دوکان سے سلاٹر ہاؤس کی جعلی مہریں پکڑ کر کارروائی شروع کردی گئی۔

تفصیلات کے مطابق جہلم کے علاقہ کالا گجراں میں پنجاب فوڈ اتھارٹی نے کارروائی کرتے ہوئے بیف شاپ سے 8من سے زائد مضرصحت اور بدبودار گوشت جبکہ 2 من سے زائد چربی سے تیارکردہ گھی برآمد کر لیا۔ دوکان سے سلاٹر ہاؤس کے ڈاکٹر کی جعلی مہریں بھی قبضے میں لی گئیں۔

فوڈ اتھارٹی کے ترجمان حارث بٹ کے مطابق قصاب کی جانب سے شہریوں میں مردار اور بیمار جانوروں کا گوشت فروخت کرنے پر کاروائی عمل میں لائی گئی۔ شبیر نامی قصاب نے دوکان کے عقب میں حویلی بنا رکھی ہے جہاں پر جانوروں کو لا کر خود ہی ذبح کرتا تھا اور پھر ان پر سلاٹر ہاؤس کے ڈاکٹر کی جعلی مہریں لگا کر گوشت مارکیٹ میں فروخت کرتا تھا۔

ترجمان کا کہنا ہے کہ شبیر نامی قصاب اسی حویلی میں چربی کو پگھلا کر گھی تیار کرتا تھا۔ برامد ہونے والا بدبودار اور مضرصحت گوشت کئی ہفتوں پرانا ہے۔ کئی ہفتوں پرانا کیڑوں والا بدبودار گوشت فریزر میں فروخت کے لئے رکھا گیا تھا۔