عوامی سہولیات کی بہتری اور شفاف نظام کا قیام ضلعی انتظامیہ کی ترجیح ہے، ڈپٹی کمشنر میر رضا اوزگن
جہلم: ڈپٹی کمشنر جہلم میر رضا اوزگن کی زیر صدارت ایک اہم اجلاس منعقد ہوا، جس میں ضلع بھر میں جاری ترقیاتی، انتظامی اور عوامی فلاحی منصوبوں کی پیش رفت کا تفصیلی جائزہ لیا گیا۔
اجلاس میں متعلقہ افسران کو ہدایت کی گئی کہ تمام منصوبے مقررہ وقت کے اندر مکمل کیے جائیں تاکہ شہریوں کو بہتر سہولیات فراہم کی جا سکیں۔
اجلاس کے دوران پلس پروگرام کی پیش رفت پر تفصیلی بریفنگ دی گئی، جس میں اراضی ریکارڈ کی ڈیجیٹلائزیشن، شفافیت اور جدید نظام کے نفاذ سے متعلق امور زیر غور آئے۔ ڈپٹی کمشنر نے ہدایت کی کہ تمام متعلقہ محکمے اپنی کارکردگی کو مزید بہتر بناتے ہوئے اہداف کی بروقت تکمیل یقینی بنائیں۔
گرین پراپرٹی سرٹیفکیٹس کے اجراء اور طریقہ کار پر بھی تفصیلی غور کیا گیا، جبکہ شہریوں کو آسان، شفاف اور تیز رفتار سہولیات فراہم کرنے پر زور دیا گیا۔ ڈپٹی کمشنر نے ہدایت کی کہ تمام نظام کو جدید خطوط پر استوار کرتے ہوئے عوامی مشکلات کو کم سے کم کیا جائے۔
اجلاس میں واسا جہلم کے تحت نکاسی آب، سیوریج نظام اور شہری شکایات کے فوری ازالے کا جائزہ بھی لیا گیا۔ ڈپٹی کمشنر میر رضا اوزگن نے ہدایت کی کہ نکاسی آب کے نظام کو مزید مؤثر بنایا جائے تاکہ بارشوں اور دیگر ہنگامی صورتحال میں شہریوں کو مشکلات کا سامنا نہ کرنا پڑے۔
اس موقع پر بیوٹیفکیشن سکیم اور سُتھرا پنجاب ایجنسی جہلم کی کارکردگی کا بھی جائزہ لیا گیا، جبکہ عیدالاضحیٰ کے انتظامات، صفائی، آلائشوں کی بروقت تلفی اور شہری سہولیات کی فراہمی کے لیے مربوط حکمت عملی اپنانے پر زور دیا گیا تاکہ عوام کو صاف ستھرا اور بہتر ماحول فراہم کیا جا سکے۔
