جہلم: تھانہ سٹی پولیس نے پیشہ ور بھکاریوں کے خلاف کارروائی کرتے ہوئے 2 خواتین سمیت 6 پیشہ ور بھکاریوں کو گرفتار کر لیا۔
ترجمان جہلم پولیس کے مطابق تھانہ سٹی پولیس نے شہر میں پیشہ ور بھکاریوں کے خلاف کارروائی کرتے ہوئے مختلف مقامات پر موجود 6 افراد کو گرفتار کیا، جن میں 2 خواتین بھی شامل ہیں۔ پولیس کے مطابق گرفتار افراد کے خلاف الگ الگ مقدمات درج کیے گئے ہیں اور مزید قانونی کارروائی جاری ہے۔
پولیس کا کہنا ہے کہ پیشہ ور بھکاری مختلف شاہراہوں، چوک چوراہوں اور اہم عوامی مقامات پر کھڑے ہو کر شہریوں کے لیے مشکلات پیدا کرتے ہیں۔ ایسے مقامات پر بھکاریوں کی موجودگی سے نہ صرف ٹریفک کی روانی متاثر ہوتی ہے بلکہ شہریوں کے مطابق بعض اوقات یہ صورتحال حادثات کا سبب بھی بن سکتی ہے۔
جہلم پولیس نے شہریوں سے اپیل کی ہے کہ پیشہ ور بھکاریوں کی حوصلہ شکنی کریں اور ایسے عناصر کو بھیک دینے سے گریز کریں۔ پولیس کے مطابق شہریوں کے تعاون سے پیشہ ور بھکاریوں اور عوامی مقامات پر مشکلات پیدا کرنے والے عناصر کے خلاف کارروائی کو مزید مؤثر بنایا جا سکتا ہے۔
شہریوں سے یہ بھی اپیل کی گئی ہے کہ کسی بھی مشکوک سرگرمی یا عوامی مشکلات کا باعث بننے والے عناصر کے بارے میں فوری طور پر پولیس کو اطلاع دیں تاکہ بروقت قانونی کارروائی عمل میں لائی جا سکے۔
ڈی پی او جہلم شفیق احمد چوہدری نے کہا کہ شہریوں کے جان و مال کا تحفظ پولیس کی اولین ترجیح ہے اور عوامی مقامات پر شہریوں کو درپیش مسائل کے خاتمے کے لیے قانون کے مطابق کارروائیاں جاری رکھی جائیں گی۔
-
-
-
-
