جہلم میں جدید آئی اسپتال، 5 منٹ میں لیزر کے ذریعے عینک سے نجات ممکن
جہلم شہر میں آنکھوں کے امراض کے علاج کے لیے جدید سہولیات فراہم کرنے والا ادارہ رضیہ فاؤنڈیشن آئی اسپتال عوام کے لیے کسی نعمت سے کم نہیں، جہاں جدید لیزر ٹیکنالوجی کے ذریعے صرف پانچ منٹ میں عینک سے نجات ممکن بنا دی گئی ہے۔
اس حوالے سے اسپتال کے چیف ایگزیکٹو ندیم الحسنین نے میڈیا نمائندگان سے گفتگو کرتے ہوئے بتایا کہ جہلم، چکوال، منڈی بہاؤالدین، گجرات اور میرپور آزاد کشمیر سمیت گردونواح کے مریض بھی اس سہولت سے مستفید ہو رہے ہیں۔
انہوں نے بتایا کہ ادارے کو قائم ہوئے پندرہ سال سے زائد کا عرصہ گزر چکا ہے اور اس دوران ہزاروں افراد کی بینائی کامیابی سے بحال کی جا چکی ہے جبکہ روزانہ درجنوں مریض او پی ڈی سے فائدہ اٹھا رہے ہیں۔
ندیم الحسنین نے مزید بتایا کہ اسپتال میں جدید لیزر سسٹم کے ذریعے علاج کیا جاتا ہے، جس میں نہ ٹیکہ لگایا جاتا ہے اور نہ ہی ٹانکوں کی ضرورت پیش آتی ہے۔ مریض چند ہی منٹوں میں عینک سے چھٹکارا حاصل کر کے فوری طور پر گھر جا سکتے ہیں۔
چیف ایگزیکٹو ندیم الحسنین کے مطابق اب شوگر کے مریضوں کے لیے بھی آنکھوں کا آپریشن محفوظ اور ممکن بنا دیا گیا ہے، جبکہ مریضوں کو طویل عرصہ اسپتال میں داخل رکھنے کی ضرورت بھی نہیں رہتی۔
انہوں نے عوام سے اپیل کی کہ وہ اس جدید سہولت سے بھرپور فائدہ اٹھائیں اور اپنی آنکھوں کے مسائل کا بروقت علاج کروائیں تاکہ بینائی کو محفوظ بنایا جا سکے۔
