ڈپٹی کمشنر جہلم کا سول ہسپتال اور ڈسٹرکٹ جیل کا دورہ، مریضوں اور اسیران میں عید گفٹ تقسیم کئے
جہلم: ڈپٹی کمشنر جہلم میثم عباس کا سول ہسپتال اور ڈسٹرکٹ جیل کا دورہ، مریضوں اور اسیران میں عید گفٹ تقسیم کیے۔
ڈپٹی کمشنر جہلم میثم عباس نے عیدالفطر کے پرمسرت موقع پر سول ہسپتال اور ڈسٹرکٹ جیل کا دورہ کیا جہاں انہوں نے مریضوں، ان کے لواحقین اور اسیران سے ملاقات کرکے انہیں عید کی مبارکباد دی۔
ڈپٹی کمشنر نے سول ہسپتال میں مریضوں کی عیادت کی، ان میں عید گفٹ اور مٹھائی تقسیم کی اور اسپتال کے عملے کو بھی عید کی خوشیوں میں شریک کیا۔ انہوں نے مریضوں سے ان کے مسائل دریافت کیے اور بہتر طبی سہولیات کی فراہمی کو یقینی بنانے کی ہدایت کی۔
انہوں نے ہسپتال کے مختلف وارڈز کا دورہ کیا اور صفائی سمیت دیگر انتظامات کا جائزہ لیا۔ ڈپٹی کمشنر نے عملے کو ہدایت دی کہ مریضوں کو ہر ممکن سہولت فراہم کی جائے تاکہ وہ بہتر ماحول میں علاج معالجہ حاصل کر سکیں۔
بعد ازاں ڈپٹی کمشنر نے ڈسٹرکٹ جیل کا دورہ کیا جہاں جیل سپرنٹنڈنٹ سید حسن مجتبیٰ کے ہمراہ اسیران سے ملاقات کی اور ان میں عید گفٹ تقسیم کیے۔ انہوں نے جیل کے لنگر خانے کا معائنہ کرتے ہوئے کھانے کے معیار کو چیک کیا اور انتظامات پر اطمینان کا اظہار کیا۔
ڈپٹی کمشنر نے جیل ہسپتال میں زیرعلاج قیدیوں کی خیریت دریافت کی اور ان کے مسائل سنے۔ انہوں نے جیل انتظامیہ کو ہدایت کی کہ قیدیوں کو بنیادی سہولیات کی فراہمی میں کسی قسم کی کوتاہی نہ کی جائے اور انہیں ایک بہتر اور محفوظ ماحول فراہم کیا جائے۔
ڈپٹی کمشنر جہلم میثم عباس نے کہا کہ عید خوشیوں کا موقع ہے اور ہمیں چاہیے کہ ہم معاشرے کے ہر طبقے کو اس میں شامل کریں، خاص طور پر وہ افراد جو بیماری یا قید کی وجہ سے اپنے گھروں میں عید نہیں مناسکتے۔ انہوں نے اس موقع پر سول ہسپتال اور جیل کے عملے کی کارکردگی کو سراہا اور انہیں ہدایت دی کہ وہ اپنی خدمات کو مزید بہتر بنائیں۔
