ستھرا پنجاب پروگرام کے تحت جہلم کی تمام تحصیلوں میں مساجد اور شہروں کی صفائی کا خصوصی آپریشن
جہلم: وزیر اعلیٰ پنجاب مریم نواز شریف کے وژن اور ہدایات کے مطابق ستھرا پنجاب پروگرام کے تحت راولپنڈی ڈویژن کی 22 تحصیلوں میں جمعہ کے روز مساجد اور شہروں کی خصوصی صفائی مہم کا انعقاد کیا گیا۔
اس مہم کے دوران مساجد کی مکمل صفائی، چونے کا چھڑکاؤ اور عوامی آگاہی کے خصوصی اقدامات کیے گئے۔ سی ای او راولپنڈی ویسٹ مینجمنٹ کمپنی رانا ساجد صفدر نے کہا کہ اس پروگرام کا مقصد نہ صرف شہروں کو صاف ستھرا رکھنا ہے بلکہ عوام میں صحت اور صفائی کے حوالے سے شعور بیدار کرنا بھی ہے۔
انہوں نے ہدایت دی کہ صفائی کے اقدامات بہترین معیار کے مطابق ہوں، مساجد میں چونے کا چھڑکاؤ یقینی بنایا جائے اور آگاہی مہم میں کوئی کمی نہ رہنے دی جائے۔ ان کا کہنا تھا کہ شہریوں کو صاف اور صحت مند ماحول فراہم کرنا حکومت کی ترجیح ہے، کیونکہ صفائی عوامی صحت اور فلاح کے لیے بنیادی حیثیت رکھتی ہے۔
وزیر اعلیٰ پنجاب مریم نواز شریف نے اس بات پر زور دیا کہ صفائی صرف حکومتی نہیں بلکہ ہر شہری کی اجتماعی ذمہ داری ہے۔ انہوں نے ہدایت دی کہ شہروں کے ساتھ ساتھ دیہی علاقوں میں بھی صفائی کے لیے مربوط حکمت عملی اپنائی جائے تاکہ گلیاں، بازار اور عبادت گاہیں ہر وقت صاف ستھری رہیں۔
خصوصی آپریشن کے دوران ٹیموں نے مساجد، بازاروں اور عوامی مقامات کی صفائی مکمل کی اور نمازیوں کو صحت و صفائی کی اہمیت سے متعلق آگاہی فراہم کی۔ رانا ساجد صفدر نے تمام ٹیموں کی محنت کو سراہتے ہوئے کہا کہ یہ اقدامات شہریوں کی صحت اور فلاح کے لیے سنگ میل ثابت ہوں گے اور ستھرا پنجاب پروگرام کو کامیاب بنانے میں مددگار ہوں گے۔
