جہلم میں پیشہ ور بھکاریوں کے خلاف ایکشن، پولیس نے 2 بھکارنیں گرفتار کر لیں

جہلم: پولیس نے پیشہ ور بھکاریوں کے خلاف اہم کارروائی کرتے ہوئے دو بھکارنوں کو گرفتار کر لیا۔

تفصیلات کے مطابق جہلم میں ایس ایچ او تھانہ سٹی اور ان کی ٹیم نے مختلف شاہراہوں اور چوک چوراہوں پر جاری چیکنگ کے دوران پیشہ ور بھکاری خواتین کو گرفتار کیا، جو سڑکوں پر کھڑے ہو کر نہ صرف ٹریفک کی روانی میں رکاوٹ بن رہی تھیں بلکہ حادثات کا سبب بھی بن سکتی تھیں۔

پولیس کے مطابق گرفتار ملزمان کے خلاف الگ الگ مقدمات درج کر کے قانونی کارروائی کا آغاز کر دیا گیا ہے۔

اس حوالے سے ڈسٹرکٹ پولیس آفیسر جہلم طارق عزیز سندھو نے کہا کہ پیشہ ور بھکاری شہریوں کے لیے خطرہ بن سکتے ہیں اور ان کے خلاف کارروائیاں بلا امتیاز جاری رکھی جائیں گی۔ انہوں نے واضح کیا کہ ٹریفک کی روانی متاثر کرنے اور عوامی تحفظ کو خطرے میں ڈالنے والے عناصر کے ساتھ کسی قسم کی رعایت نہیں برتی جائے گی۔

ڈی پی او جہلم نے شہریوں سے بھی اپیل کی کہ وہ پیشہ ور بھکاریوں کی حوصلہ شکنی کریں اور ایسے عناصر کو پیسے دینے سے گریز کریں، تاکہ اس سماجی برائی کا خاتمہ ممکن ہو سکے۔