جہلم پولیس کا منشیات فروشوں کے خلاف ایکشن، دو ملزمان منشیات سمیت گرفتار

جہلم پولیس کی منشیات فروشوں کے خلاف بڑی کارروائی، 2 منشیات فروش گرفتار کر لیے گئے جبکہ بھاری مقدار میں منشیات برآمد کر لی گئی۔

تفصیلات کے مطابق ڈی پی او جہلم طارق عزیز سندھو کی خصوصی ہدایت پر ایس ایچ او تھانہ چوٹالہ اور ٹیم نے کارروائی کرتے ہوئے دو منشیات فروشوں کو حراست میں لیا۔ پولیس نے ملزمان کے قبضے سے 1 کلو 60 گرام آئس اور 537 گرام چرس برآمد کر لی۔

پولیس کے مطابق دونوں ملزمان کے خلاف تھانہ چوٹالہ میں الگ الگ مقدمات درج کر لیے گئے ہیں۔

ڈی پی او جہلم طارق عزیز سندھو نے کہا کہ منشیات فروش معاشرے کا ناسور ہیں، ان کے خلاف بلا امتیاز کارروائیاں جاری رہیں گی۔ انہوں نے واضح کیا کہ نوجوان نسل کو منشیات کے زہر سے بچانے کے لیے پولیس ہر ممکن اقدام کر رہی ہے اور ایسے عناصر کو کسی صورت رعایت نہیں دی جائے گی۔