جہلم میں ایل پی جی گیس کی قیمتوں میں ہوشربا اضافہ، شہری شدید مشکلات کا شکار
جہلم شہر سمیت ضلع بھر میں ایل پی جی گیس کی قیمتوں میں حالیہ ہوشربا اضافے نے مہنگائی سے پریشان شہریوں کی مشکلات میں مزید اضافہ کر دیا ہے، جس کے باعث گھریلو صارفین، ہوٹل مالکان اور چھوٹے کاروباری افراد شدید متاثر ہو رہے ہیں۔
جہلم کے مختلف علاقوں میں ایل پی جی سلنڈرز کی قیمتوں میں نمایاں اضافہ دیکھا گیا ہے جبکہ کئی مقامات پر سرکاری نرخوں کو نظر انداز کرتے ہوئے من مانی قیمتیں وصول کی جا رہی ہیں۔
شہریوں کا کہنا ہے کہ پہلے ہی اشیائے ضروریہ کی بڑھتی ہوئی قیمتوں نے زندگی اجیرن بنا دی ہے، ایسے میں ایل پی جی کی قیمتوں میں اضافہ گھریلو بجٹ پر اضافی بوجھ ڈال رہا ہے۔
مارکیٹ ذرائع کے مطابق طلب و رسد میں عدم توازن، ٹرانسپورٹ اخراجات میں اضافہ اور دیگر عوامل کو جواز بنا کر قیمتیں بڑھائی جا رہی ہیں، تاہم شہریوں کا مؤقف ہے کہ ضلعی سطح پر مؤثر چیک اینڈ بیلنس نہ ہونے کے باعث ناجائز منافع خوری کو فروغ مل رہا ہے۔
ماہرین نے خبردار کیا ہے کہ ایل پی جی کی غیر مستحکم قیمتیں نہ صرف عوامی مشکلات میں اضافہ کر رہی ہیں بلکہ چھوٹے کاروبار بھی شدید متاثر ہو رہے ہیں، جس کے معاشی اثرات مزید گہرے ہو سکتے ہیں۔
شہریوں نے حکومت اور ضلعی انتظامیہ سے مطالبہ کیا ہے کہ فوری نوٹس لیتے ہوئے ناجائز منافع خوری کے خلاف سخت کریک ڈاؤن کیا جائے، سرکاری نرخوں پر عملدرآمد یقینی بنایا جائے اور خلاف ورزی کرنے والوں کے خلاف بلا امتیاز کارروائی کی جائے تاکہ عوام کو ریلیف فراہم کیا جا سکے۔
