سوہاوہ: دار ارقم سکول ڈومیلی میں کلاس نہم و دہم کے شاندار سالانہ نتائج کے اعزاز میں ایک پروقار اور رنگا رنگ تقریب کا انعقاد کیا گیا، جس میں نمایاں تعلیمی کارکردگی کا مظاہرہ کرنے والے طلبہ و طالبات کی بھرپور حوصلہ افزائی کی گئی، جبکہ بہترین نتائج دینے والے اساتذہ کرام کو بھی تعریفی سرٹیفکیٹ پیش کیے گئے۔
تقریب کے دوران کلاس دہم میں شاندار کارکردگی کا مظاہرہ کرنے والے طالب علم محمد طحہٰ نے 1142 نمبر حاصل کرکے ادارے میں نمایاں پوزیشن حاصل کی۔ ان کی شاندار تعلیمی کامیابی کے اعتراف میں انہیں خصوصی شیلڈ اور لیپ ٹاپ بطور انعام پیش کیا گیا۔ محمد طحہٰ کی کامیابی پر تقریب میں موجود اساتذہ، والدین اور طلبہ نے خوشی کا اظہار کرتے ہوئے انہیں مبارکباد پیش کی۔
اس موقع پر دیگر نمایاں پوزیشن حاصل کرنے والے طلبہ و طالبات کو بھی ان کی بہترین تعلیمی کارکردگی پر انعامات اور تعریفی اسناد سے نوازا گیا۔ تقریب کا مقصد طلبہ کی محنت اور کامیابیوں کو سراہنے کے ساتھ ساتھ اساتذہ کرام کی انتھک محنت، خلوص اور تعلیمی خدمات کو بھی خراجِ تحسین پیش کرنا تھا۔
تقریب سے خطاب کرتے ہوئے ڈائریکٹر دارِ ارقم سکول ڈومیلی عرفان الحق نے کہا کہ محمد طحہٰ کی شاندار کامیابی اساتذہ کی محنت، لگن اور بہترین تدریسی کاوشوں کا نتیجہ ہے۔ انہوں نے کہا کہ محمد طحہٰ نے نمایاں نمبر حاصل کرکے ادارے، اپنے والدین اور علاقے کا نام روشن کیا ہے، جو دیگر طلبہ کے لیے بھی محنت اور لگن کی بہترین مثال ہے۔
انہوں نے نمایاں کارکردگی کا مظاہرہ کرنے والے دیگر طلبہ و طالبات، ان کے والدین اور اساتذہ کو بھی مبارکباد پیش کرتے ہوئے کہا کہ طلبہ کی کامیابی کے پیچھے والدین کی دعاؤں اور اساتذہ کی مسلسل محنت کا اہم کردار ہوتا ہے۔ انہوں نے اس عزم کا اظہار کیا کہ ادارہ مستقبل میں بھی طلبہ کو معیاری تعلیم اور اپنی صلاحیتوں کے اظہار کے بہترین مواقع فراہم کرتا رہے گا۔
تقریب کے اختتام پر تمام اساتذہ کرام کے اعزاز میں سالانہ اسٹاف لنچ کا بھی اہتمام کیا گیا۔ اس موقع پر ادارے کی جانب سے تمام کامیاب طلبہ، ان کے والدین اور محنتی اساتذہ کو دلی مبارکباد پیش کی گئی اور دعا کی گئی کہ اللہ تعالیٰ تمام طلبہ کو مزید کامیابیاں عطا فرمائے۔ آمین۔
-
-
-
-
