حالیہ شدید بارشوں اور سیلابی صورتحال سے ضلع جہلم کے کئی علاقوں شدید متاثر
جہلم: حالیہ شدید بارشوں اور سیلابی صورتحال نے ضلع جہلم کے کئی علاقوں کو شدید متاثر کیا ہے، جن میں یونین کونسل ڈومیلی، چوٹالہ، داراپور، خلاص پور اور جلالپور شریف سرفہرست ہیں۔
ان علاقوں میں سڑکیں ٹوٹ چکی ہیں، فصلیں تباہ ہو چکی ہیں، غریب عوام کے مکانات گر گئے اور مال مویشی سیلابی پانی میں بہہ گئے۔ بجلی کے کھمبے گرنے کے باعث کئی علاقوں میں گزشتہ پانچ دنوں سے اندھیرا ہے جبکہ پینے کے پانی کا بھی شدید بحران ہے۔
ان سنگین حالات میں، جہاں بیشتر لوگ صرف بیانات تک محدود رہے، وہیں مرکزی مسلم لیگ ضلع جہلم نے عملی اقدامات کے ذریعے اپنی موجودگی کا احساس دلایا۔ مرکزی مسلم لیگ کے صدر چوہدری ہارون الرشید اور ملک محمد افضل کی ہدایات پر پارٹی کے سینکڑوں کارکنان نے متاثرہ علاقوں میں پہلے روز سے امدادی سرگرمیاں شروع کر رکھی ہیں۔
کارکنوں کی جانب سے روزانہ صبح، دوپہر اور شام متاثرین کو کھانا فراہم کیا جا رہا ہے، جبکہ میڈیکل کیمپس کے ذریعے ادویات کی فراہمی بھی جاری ہے۔ متاثرہ عوام نے ان مشکل حالات میں مدد کو پہنچنے پر مرکزی مسلم لیگ کی قیادت کا شکریہ ادا کیا اور ان کی خدمات کو زبردست خراجِ تحسین پیش کیا۔
