جہلم کا اعزاز؛ پروفیسر ڈاکٹر چوہدری خالد محمود گوندل پنجاب ہیلتھ کیئر کمیشن کے بیرونی طبی ماہر پینل میں شامل
جہلم: ضلع جہلم کے لیے ایک اور قابلِ فخر لمحہ، معروف ماہر صحت پروفیسر ڈاکٹر چوہدری خالد محمود گوندل کو پنجاب ہیلتھ کیئر کمیشن کے بیرونی طبی ماہرین کے پینل میں شامل کر لیا گیا ہے۔
پروفیسر ڈاکٹر چوہدری خالد محمود گوندل کی تقرری نہ صرف جہلم بلکہ پورے ملک کے لیے ایک اعزاز ہے کیونکہ وہ میڈیکل ایجوکیشن اور صحت عامہ کے شعبے میں وسیع تجربہ اور غیر معمولی خدمات کے حامل ہیں۔
ڈاکٹر خالد گوندل کو پاکستان بھر میں طبی میدان میں ان کی علمی و عملی خدمات، پالیسی سازی میں کردار اور تدریسی مہارت کی بنیاد پر قدر کی نگاہ سے دیکھا جاتا ہے۔ ان کی شمولیت سے پنجاب ہیلتھ کیئر کمیشن کو خاص طور پر معیاری علاج، ہسپتالوں کے معائنے، طبی نظام کی بہتری اور بین الاقوامی معیار سے ہم آہنگی کے حوالے سے نئی جہتیں ملنے کی توقع کی جا رہی ہے۔
پنجاب ہیلتھ کیئر کمیشن ایک خودمختار ادارہ ہے جو صوبے بھر میں صحت کی سہولیات کی نگرانی، اصلاح اور ریگولیشن کے لیے سرگرم عمل ہے۔ کمیشن کی پالیسی سازی میں ماہرین کی مشاورت اہم کردار ادا کرتی ہے اور پروفیسر گوندل جیسے ماہر کی شمولیت یقیناً ادارے کی کارکردگی کو مزید مؤثر بنانے میں مددگار ثابت ہوگی۔
عوامی و طبی حلقوں نے ڈاکٹر خالد محمود گوندل کی تقرری کو خوش آئند قرار دیتے ہوئے کہا ہے کہ یہ فیصلہ نہ صرف صحت کے شعبے میں بہتری کا باعث بنے گا بلکہ نئے ڈاکٹرز اور طبی اداروں کے لیے ایک مثال بھی قائم کرے گا۔
