سوہاوہ: تعلیمی بورڈ راولپنڈی کے میٹرک سالانہ امتحانات 2026ء کے نتائج کا اعلان کر دیا گیا، جس میں جامعہ رحمانیہ رضویہ سوہاوہ کے دو ہونہار طلبہ نے شاندار کامیابی حاصل کرتے ہوئے نمایاں پوزیشنیں اپنے نام کر لیں۔
جامعہ رحمانیہ رضویہ کے طالب علم محمد علی نے 1200 میں سے 1048 نمبر حاصل کر کے راولپنڈی بورڈ میں دوسری پوزیشن حاصل کی، جبکہ طالب علم محمد عبدالغفار نے 1044 نمبر حاصل کر کے تیسری پوزیشن اپنے نام کی۔
دونوں طلبہ کی شاندار کامیابی پر جامعہ رحمانیہ رضویہ کے مہتمم قاری عصمت اللہ سیالوی، اساتذہ کرام، والدین اور دیگر طلبہ کی جانب سے خوشی کا اظہار کیا گیا ہے۔ اس کامیابی نے جامعہ رحمانیہ رضویہ کی تعلیمی کارکردگی کو ایک بار پھر نمایاں کر دیا ہے۔
اس موقع پر اہلِ علاقہ کا کہنا تھا کہ جامعہ رحمانیہ رضویہ سوہاوہ نہ صرف دینی تعلیم بلکہ عصری تعلیم کے میدان میں بھی نمایاں خدمات انجام دے رہا ہے اور طلبہ کی بہترین تعلیم و تربیت کے باعث ہر سال شاندار نتائج سامنے آ رہے ہیں۔
راولپنڈی بورڈ میں دوسری اور تیسری پوزیشن حاصل کرنے پر تحصیل پریس کلب سوہاوہ اور اہلِ علاقہ نے دونوں طلبہ، ان کے والدین، مہتمم اور اساتذہ کرام کو دلی مبارکباد پیش کی اور ان کے روشن مستقبل کے لیے نیک تمناؤں کا اظہار کیا۔
