دینہ میں ایک اور مویشی چوری کی واردات، نامعلوم چور 10 لاکھ روپے مالیت کے مویشی لے اڑے

دینہ کے نواحی علاقہ میں ایک اور مویشی چوری کی واردات ، نامعلوم چور حویلی کا تالا توڑ کر ڈیرہ سے 10لاکھ روپے مالیت کی 2گائیں اور 2بچھڑے لے اڑے، پولیس تھانہ منگلا کینٹ نے رپورٹ درج کر لی ۔

تفصیلات کے مطابق جہلم کی تحصیل دینہ کے نواحی علاقے ہرل میں نامعلوم چوروں نے رات کے اندھیرے کا فائدہ اٹھاتے ہوئے ملک وقاص ولد ملک مطلوب سکنہ ہرل کی حویلی کا تالا توڑ کر 10 لاکھ روپے مالیت کی 2 گائیں اور 2 بچھڑے چرا لیے۔

چوروں نے ڈیرہ پر موجود مویشیوں کو کھول کر لے گئے اور صبح جب مالک ڈیرہ پہنچا تو تالے ٹوٹے ہوئے تھے اور مویشی غائب تھے۔ متاثرہ شخص نے فوراً پولیس تھانہ منگلا کینٹ کو رپورٹ کی، جس پر پولیس نے مقدمہ درج کر کے چوروں کی تلاش شروع کر دی ہے۔