جہلم: ضلع جہلم میں ہونے والی موسلا دھار بارش نے معمولاتِ زندگی شدید متاثر کر دیے۔ بارش کے باعث مختلف علاقوں میں برساتی نالوں اور نشیبی مقامات پر پانی جمع ہوگیا، جبکہ کئی علاقوں میں بارشی پانی گھروں اور دکانوں میں داخل ہونے سے شہریوں اور تاجروں کو مشکلات کا سامنا کرنا پڑا۔
لنگر پور روڈ پر ٹھٹھی گجراں گاؤں کے قریب تیز بارشی ریلے کے باعث دو گاڑیاں پانی میں پھنس گئیں۔ ریسکیو 1122 کے مطابق ایک گاڑی میں ایک شخص جبکہ دوسری میں دو افراد سوار تھے۔ اطلاع ملتے ہی ریسکیو ٹیمیں موقع پر پہنچیں اور تینوں افراد کو بحفاظت پانی سے نکال کر محفوظ مقام پر منتقل کر دیا۔
دوسری جانب جہلم کی تحصیل دینہ میں کالو وال روڈ پر واقع پلی بھی تیز بارشی ریلے کی زد میں آکر بہہ گئی، جس کے باعث متعدد علاقوں کا زمینی رابطہ متاثر ہوا۔
ادھر بڑل سمال ڈیم کا سپیل وے اوور فلو ہونے سے بارشی پانی آبادی میں داخل ہوگیا۔ ریسکیو ٹیموں نے موقع پر پہنچ کر امدادی کارروائیاں شروع کر دیں۔ ریسکیو انچارج رانا سعید کے مطابق پانی گھروں میں داخل ہوا تاہم کسی قسم کا جانی نقصان نہیں ہوا، جبکہ پانی کی سطح کم ہونا شروع ہوگئی ہے اور جلد صورتحال معمول پر آنے کی توقع ہے۔
موسلا دھار بارش کے باعث سگریٹ فیکٹری اور لنگر پور روڈ سمیت مختلف علاقوں میں بھی پانی جمع ہونے کی اطلاعات ہیں، جس سے ٹریفک اور آمدورفت متاثر ہوئی۔
شدید بارش اور ممکنہ سیلابی صورتحال کے پیش نظر جہلم پولیس بھی ضلع بھر میں متحرک ہے۔ پولیس افسران و اہلکار بارش سے متاثرہ علاقوں میں شہریوں کی مدد، ٹریفک کی روانی برقرار رکھنے اور کسی بھی ہنگامی صورتحال سے نمٹنے کے لیے فرائض انجام دے رہے ہیں۔
پولیس ٹیمیں متاثرہ علاقوں میں موجود ہیں اور ضرورت مند شہریوں کو بروقت مدد فراہم کرنے کے ساتھ ساتھ انہیں محفوظ مقامات تک منتقل کرنے میں بھی معاونت کر رہی ہیں۔
ڈی پی او جہلم شفیق احمد چوہدری نے پولیس افسران و اہلکاروں کو ہدایت کی ہے کہ شدید بارش کے دوران شہریوں کی جان و مال کے تحفظ اور فوری امداد کے لیے تمام دستیاب وسائل بروئے کار لائے جائیں۔
انہوں نے شہریوں سے اپیل کی کہ کسی بھی ہنگامی صورتحال میں پولیس سے فوری مدد حاصل کریں۔ جہلم پولیس مشکل کی اس گھڑی میں شہریوں کے ساتھ کھڑی ہے۔
