دینہ: شہید کانسٹیبل ذیشان علی کی چوتھی برسی کے موقع پر جہلم پولیس کی جانب سے انہیں بھرپور خراجِ عقیدت پیش کیا گیا۔
پولیس افسران نے شہید کی قبر پر حاضری دی، پھولوں کی چادر چڑھائی، فاتحہ خوانی کی اور پولیس کے چاق و چوبند دستے نے شہید کو سلامی پیش کی۔
تقریب میں ڈی ایس پی سوہاوہ سرکل اکرام اللہ نیازی، ایس ایچ او تھانہ منگلا کینٹ اور دیگر پولیس افسران نے شرکت کی۔ اس موقع پر شہید کی بلندی درجات، وطن کی سلامتی اور پولیس کے دیگر شہداء کے لیے خصوصی دعائیں بھی کی گئیں۔
پولیس کے مطابق شہید کانسٹیبل ذیشان علی نے ملزمان کی گرفتاری کے لیے پولیس پارٹی کے ہمراہ چھاپہ مار کارروائی کے دوران جرأت و بہادری کا مظاہرہ کیا، تاہم ملزمان کی فائرنگ سے جامِ شہادت نوش کیا اور اپنے فرائض کی ادائیگی کے دوران وطن پر قربان ہو گئے۔
ڈسٹرکٹ پولیس آفیسر (ڈی پی او) شفیق احمد چوہدری نے اپنے پیغام میں کہا کہ شہداء پولیس ہمارا قیمتی اثاثہ ہیں، جنہوں نے اپنے خون سے ملک و ملت کے امن اور استحکام کی آبیاری کی۔ انہوں نے کہا کہ شہداء پولیس ہمارے محسن ہیں، جنہوں نے بہادری اور شجاعت کی لازوال داستانیں رقم کرتے ہوئے ہمیشہ کے لیے امر ہونے کا اعزاز حاصل کیا۔
ڈی پی او نے مزید کہا کہ شہداء کی قربانیاں جہلم پولیس اور عوام پر ایک امانت اور قرض ہیں، کیونکہ انہوں نے اپنا آج قوم کے محفوظ کل کے لیے قربان کیا۔ انہوں نے اس عزم کا اعادہ کیا کہ ملک و ملت کی حفاظت کے لیے کسی بھی قربانی سے دریغ نہیں کیا جائے گا۔
انہوں نے کہا کہ شہداء پولیس کے اہل خانہ جہلم پولیس کی ذمہ داری ہیں اور انہیں کبھی تنہا نہیں چھوڑا جائے گا۔ شہداء محکمہ پولیس کا ہمیشہ قابلِ فخر حصہ رہے ہیں اور آئندہ بھی ان کی قربانیوں کو عزت و احترام کے ساتھ یاد رکھا جائے گا۔
-
-
-
-
