موسم برسات میں جگہ جگہ پانی جمع ہونے سے ڈینگی کی افزائش کا خدشہ بڑھ چکا ہے، ڈپٹی کمشنر جہلم
جہلم: برسات کے موسم میں جگہ جگہ پانی جمع ہونے سے ڈینگی وائرس کی افزائش کا خطرہ بڑھ چکا ہے۔ اس ضمن میں ڈپٹی کمشنر جہلم میثم عباس نے ڈینگی کنٹرول کمیٹی کے اجلاس کی صدارت کرتے ہوئے تمام متعلقہ اداروں کو فوری اور مؤثر اقدامات کی ہدایت جاری کر دی۔
اجلاس میں گفتگو کرتے ہوئے ڈپٹی کمشنر میثم عباس کا کہنا تھا کہ تمام ادارے ڈینگی لاروا کی افزائش کے ممکنہ مقامات کی تلاش اور خاتمے کے لیے اپنی کارروائیاں مزید تیز کریں تاکہ بروقت اقدامات سے شہریوں کو اس موزی مرض سے محفوظ رکھا جا سکے۔
محکمہ صحت کی جانب سے اجلاس میں بریفنگ دیتے ہوئے بتایا گیا کہ ضلع بھر میں 56 ٹیمیں آؤٹ ڈور جبکہ 168 ٹیمیں انڈور سرویلنس پر مامور ہیں۔ اس کے ساتھ ساتھ محکمہ ماحولیات، محکمہ تعلیم، میونسپل کمیٹی اور دیگر ادارے بھی مختلف مقامات پر ڈینگی لاروا کی نشاندہی اور روک تھام میں مصروف عمل ہیں۔
ڈپٹی کمشنر نے ہدایت دی کہ جن مقامات پر پانی جمع ہے اور جہاں ڈینگی کی افزائش کا خدشہ پایا جاتا ہے، وہاں ہنگامی بنیادوں پر چیکنگ اور پانی کی فوری نکاسی کو یقینی بنایا جائے۔ اجلاس کے دوران محکمہ صحت کے ڈینگی کنٹرول پروگرام کے افسران نے راولپنڈی ڈویژن کے دیگر اضلاع میں ڈینگی کی صورتحال اور اس کے ضلع جہلم پر ممکنہ اثرات پر بھی تفصیلی بریفنگ دی۔
ڈپٹی کمشنر نے عوام سے بھی اپیل کی کہ وہ گھروں اور اردگرد کے ماحول کو صاف رکھیں اور پانی جمع نہ ہونے دیں تاکہ ڈینگی سے بچاؤ ممکن بنایا جا سکے۔
