جہلم پولیس کا گوجرانوالہ میں ریڈ، ملزمان کی فائرنگ سے کانسٹیبل زخمی

جہلم: پولیس تھانہ سول لائن کی ٹیم نے ضلع گوجرانوالہ میں گاڑی کی برآمدگی اور ملزم کی گرفتاری کے لئے مقامی پولیس قلعہ دیدار سنگھ کے ہمراہ کارروائی کی۔

پولیس ٹیم کامیاب کاروائی کے بعد ضلع جہلم کے لئے روانہ ہوئی تو پولیس ریڈنگ پارٹی پر ملزمان نےفائرنگ کر دی جس کے نتیجہ میں کانسٹیبل ابرار خالد زخمی ہو گئے،جنہیں فوری ٹراما سنٹر گوندلانوالہ، ضلع گوجرانوالہ منتقل کیا گیا۔

ڈسٹرکٹ پولیس آفیسر ناصر محمود باجوہ نے ٹراما سنٹر گوندلانوالہ کا دورہ کیا۔ ڈی پی او جہلم نے ملزمان کی فائرنگ سے زخمی ہونے والے کانسٹیبل ابرار خالد کی عیادت کی، جلد صحت یابی کی دعا کے ساتھ نیک خواہشات کا اظہار کیا۔

ڈی پی او نے زخمی کانسٹیبل ابرار خالد کو علاج معالجہ کی بہترین سہولیات کی فراہمی یقینی بنانے کے لئے ڈاکٹر صاحبان سے ملاقات کی، ایس ایچ او سول لائن جہلم اور انچارج ویلفیئربرانچ کو بہترین علاج کی فراہمی کے لئے ضروری ہدایات دیں۔

ڈی پی او ناصر محمود باجوہ نے کہا کہ جرائم پیشہ عناصر کے خلاف سینہ سپر ابرارخالدجیسےپولیس افسران جہلم پولیس کا قیمتی سرمایہ ہیں، شہریوں اور پولیس پر حملہ کرنے والے ملزمان قانون کی گرفت سے نہیں بچ سکتے۔ شہریوں کے اثاثہ جات کی حفاظت اور جرائم پیشہ عناصر کا مقابلہ کرنے والے شہداء اور غازی ہمارا فخر ہیں۔