ریسکیو 1122 جہلم کی ماہ ستمبر کی کارکردگی رپورٹ جاری، 2712 افراد کو ریسکیو کیا گیا، 84 افراد جان کی بازی ہار گئے
جہلم: ڈسٹرکٹ ایمرجنسی آفیسر ریسکیو 1122 جہلم انجینئر سعید احمد کی صدارت میں منعقدہ اجلاس میں ادارے کی ماہ ستمبر 2025 کی کارکردگی رپورٹ پیش کی گئی۔
رپورٹ کے مطابق ریسکیو 1122 جہلم نے بروقت رسپانس کرتے ہوئے مجموعی طور پر 2712 افراد کو ریسکیو کیا اور ابتدائی طبی امداد فراہم کرنے کے بعد 1550 مریضوں کو مختلف ہسپتالوں میں منتقل کیا۔
ڈسٹرکٹ ایمرجنسی آفیسر نے بتایا کہ ستمبر کے دوران ریسکیو کی ہیلپ لائن پر 12413 کالز موصول ہوئیں جن میں سے 2703 ایمرجنسی کالز تھیں۔ ان ایمرجنسیز میں 379 روڈ ٹریفک حادثات، 1906 میڈیکل ایمرجنسیز، آگ لگنے کے 11 واقعات، کرائم سے متعلق 36 ایمرجنسیز، 2 عمارت گرنے کے واقعات اور 369 متفرق ایمرجنسیز شامل تھیں۔ ان واقعات میں مجموعی طور پر 84 افراد اپنی جان کی بازی ہار گئے جن میں اکثریت میڈیکل ایمرجنسیز کی تھی۔
رپورٹ میں مزید بتایا گیا کہ ریسکیو 1122 جہلم نے بہتر کارکردگی کا تسلسل برقرار رکھتے ہوئے اوسطاً 9 منٹ کے ریسپانس ٹائم کے اندر متاثرین کو ریسکیو کیا۔ علاوہ ازیں حالیہ سیلابی صورتحال میں ریسکیو 1122 جہلم کی ٹیموں نے وزیرآباد، گوجرانوالہ، بہاولنگر، وہاڑی اور ملتان میں سینکڑوں افراد کو ریسکیو کرکے محفوظ مقامات پر منتقل کیا۔
کمیونٹی سیفٹی پروگرام کے تحت ریسکیو کی جانب سے مختلف اداروں میں فرسٹ ایڈ اور فائر سیفٹی کی ٹریننگز کا انعقاد کیا گیا، جبکہ یونین کونسل سطح پر کمیونٹی ایمرجنسی رسپانس ٹیم کی تشکیل اور سکاوٹس کے لئے CADRE ٹریننگ کا سلسلہ بھی جاری رہا۔
مزید برآں پیشنٹ ٹرانسفر سروس کے تحت ضلع جہلم سے 105 مریضوں کو بہتر طبی سہولیات کی فراہمی کے لیے راولپنڈی، اسلام آباد اور سرگودھا کے بڑے ہسپتالوں میں منتقل کیا گیا۔
ڈسٹرکٹ ایمرجنسی آفیسر انجینئر سعید احمد نے ریسکیورز کی کارکردگی کو حوصلہ افزا قرار دیتے ہوئے کہا کہ ریسکیو 1122 جہلم کی ٹیم ہر وقت آفات سے نمٹنے کے لیے تیار ہے اور کسی بھی ناگہانی صورتحال میں عوام کو بہترین سروسز فراہم کر رہی ہے۔
