شہریوں کی جان و مال کی خاطر اپنی جانوں کے نذرانے دینے والے شہداء ہمارا فخر ہیں، مشیر صحت ڈاکٹر اظہر کیانی
جہلم: شہریوں کی جان و مال کے تحفظ کی خاطر اپنی جان کا نذرانہ پیش کرنے والے شہداء ہمارا فخر ہیں۔
ان خیالات کا اظہار مشیر صحت پنجاب میجر جنرل (ر) ڈاکٹر اظہر کیانی نے کیا، جو پولیس لائن جہلم میں سیلابی سرگرمیوں کے دوران شہید ہونے والے کانسٹیبل حیدر کی نماز جنازہ کے بعد ان کے اہل خانہ سے اظہار تعزیت کر رہے تھے۔
مشیر صحت پنجاب ڈاکٹر اظہر کیانی نے کہا کہ کانسٹیبل حیدر نے شہریوں کی مدد کرتے ہوئے اپنی جان قربان کی، جو ہم سب کے لیے باعث فخر اور عزم و ہمت کی روشن مثال ہے۔ انہوں نے کہا کہ موجودہ ملکی حالات میں تمام ادارے دن رات شہریوں کی خدمت میں مصروف ہیں اور جہلم شہر کے مختلف علاقوں میں سیلاب کے بعد تمام اداروں نے جس جذبے اور لگن سے امدادی سرگرمیوں میں حصہ لیا وہ قابل تحسین ہے۔
انہوں نے مزید کہا کہ شہید کانسٹیبل نے اپنی جان قربان کر کے نہ صرف پنجاب پولیس بلکہ پوری پنجاب حکومت کا سر فخر سے بلند کر دیا ہے۔
اس موقع پر کمشنر راولپنڈی انجینئر عامر خٹک بھی موجود تھے، جنہوں نے شہید کے اہل خانہ سے ملاقات کی اور ان کے صبر و استقامت کو سلام پیش کیا۔ کمشنر راولپنڈی نے اہل خانہ کو پنجاب حکومت کی جانب سے مکمل امداد اور ہر ممکن تعاون کی یقین دہانی بھی کروائی۔
شہید کانسٹیبل حیدر کی نماز جنازہ میں ڈپٹی کمشنر جہلم میثم عباس، اعلیٰ پولیس افسران، ضلعی انتظامیہ کے افسران و ملازمین سمیت بڑی تعداد میں پولیس اہلکاروں اور شہریوں نے شرکت کی۔ نماز جنازہ کی ادائیگی کے بعد شہید کی میت ان کے آبائی علاقے پنڈی سیدپور روانہ کر دی گئی جہاں مکمل سرکاری اعزاز کے ساتھ تدفین عمل میں لائی جائے گی۔
