12
جہلم میں پیرا فورس نے فوڈ ڈیپارٹمنٹ کے ہمراہ مشترکہ کارروائی کرتے ہوئے ایک چکن شاپ سے 180 کلو گرام ناقص، غیر معیاری اور مضرِ صحت مرغی کا گوشت برآمد کر لیا۔
تفصیلات کے مطابق جہلم میں پیرا فورس اور فوڈ ڈیپارٹمنٹ کی ٹیموں نے تھانہ صدر کے علاقے عائشہ کلینک روڈ بلال ٹاؤن میں قائم عمران چکن شاپ کا معائنہ کیا، جہاں بڑی مقدار میں فریز شدہ، ناقابلِ استعمال اور مضرِ صحت مرغی کا گوشت موجود تھا۔ برآمد ہونے والا تقریباً 180 کلو گوشت موقع پر ہی قواعد و ضوابط کے مطابق تلف کر دیا گیا۔
حکام کے مطابق چکن شاپ کے مالک کو گرفتار کر کے فوجداری کارروائی کے لیے جہلم پولیس سے رجوع کر لیا گیا ہے، جبکہ مزید قانونی کارروائی جاری ہے۔ انتظامیہ کا کہنا ہے کہ عوام کی صحت سے کھیلنے والوں کے خلاف بلا امتیاز کارروائیاں جاری رکھی جائیں گی۔
شہریوں نے پیرا فورس اور فوڈ ڈیپارٹمنٹ کی بروقت کارروائی کو سراہتے ہوئے متعلقہ ذمہ داران کو خراجِ تحسین پیش کیا ہے۔ عوامی حلقوں نے شہریوں سے اپیل کی ہے کہ وہ فریز شدہ یا مشکوک گوشت ہرگز نہ خریدیں اور مضرِ صحت اشیائے خورونوش کی فوری اطلاع متعلقہ اداروں کو دیں تاکہ انسانی صحت کو محفوظ بنایا جا سکے۔
-
-
-
-
