ڈپٹی کمشنر جہلم کا ٹی ایچ کیو ہسپتال پنڈدادنخان کا دورہ، مفت ادویات اور بہتر سہولیات کی ہدایت

پنڈدادنخان: ڈپٹی کمشنر جہلم میر رضا اوزگن نے تحصیل ہیڈ کوارٹر ہسپتال پنڈدادنخان کا تفصیلی دورہ کیا اور طبی سہولیات، عملے کی حاضری اور ادویات کی دستیابی کا جائزہ لیا۔ اس موقع پر اسسٹنٹ کمشنر پنڈدادنخان عائشہ شفقت بھی ان کے ہمراہ تھیں۔

ڈپٹی کمشنر نے ہسپتال کی فارمیسی کا معائنہ کرتے ہوئے ادویات کی فراہمی کو باریک بینی سے چیک کیا اور مریضوں کو مفت ادویات کی دستیابی ہر صورت یقینی بنانے کی ہدایت جاری کی۔

دورے کے دوران انہوں نے مختلف وارڈز میں زیر علاج مریضوں اور ان کے لواحقین سے ملاقات کی اور فراہم کردہ سہولیات اور عملے کے رویے کے بارے میں دریافت کیا۔ اس موقع پر انہوں نے ہسپتال انتظامیہ کو صفائی کے نظام کو مزید بہتر بنانے اور مریضوں کی شکایات کے فوری ازالے کی ہدایت کی۔

ڈپٹی کمشنر میر رضا اوزگن نے واضح کیا کہ مریضوں کے ساتھ خوش اخلاقی سے پیش آنا اور بروقت طبی امداد کی فراہمی یقینی بنانا اولین ترجیح ہے۔ انہوں نے کہا کہ ضلعی انتظامیہ کا مقصد عوام کو ان کی دہلیز پر بہترین علاج کی سہولت فراہم کرنا ہے تاکہ شہریوں کو زیادہ سے زیادہ ریلیف مل سکے۔